Brúðkaupið í Kana; fyrsta ferð Jesú til Jerúsalem, og gjörðir þar.

1Og á þriðja degi a) var haldið brúðkaup í Kana í Galíleu.2Þar var Jesú móðir, en Jesú og hans lærisveinum var líka boðið til brúðkaupsins.3Og er vín þraut, sagði móðir Jesú til hans: þeir hafa ekki vín.4Jesús sagði til hennar: Móðir! hvað kemur það við þér og mér? minn tími er enn ekki kominn.5Móðir hans sagði til þénaranna: hvað helst hann segir yður, það gjörið.6En þar voru sex vatnsker af steini, sett þangað af því Gyðingar þvo sér oft, og tók hvört þeirra tvo eður þrjá mælira.7Jesús sagði til þeirra: fyllið nú kerin með vatni og þeir fylltu þau á barma.8Þá sagði hann til þeirra: ausið nú af og færið forstöðumanni veislunnar og þeir gjörðu svo.9En sem hann smakkaði vatnið, sem orðið var að víni og vissi ekki hvaðan það var komið, (en þénararnir, sem vatnið jusu, vissu það), kallaði hann á brúðgumann og sagði:10allir menn veita fyrst góða vínið, en þegar gestirnir taka ölvaðir að verða, þá hið lakara; þú hefir geymt góða vínið þangað til nú.11Þetta, sem Jesús gjörði í Galíleu, var það fyrsta af jarteiknum hans. Og hann opinberaði sína dýrð og hans lærisveinar trúðu á hann.
12Eftir þetta fór Jesús til Kapernaum, hann og móðir hans, bræður og lærisveinar, en voru þar ekki marga daga, því páskahátíð Gyðinga fór í hönd.13Þá ferðaðist Jesús upp til Jerúsalem.14Þar fann hann í musterinu þá, sem seldu naut, sauði og dúfur og þá menn sitjandi, er höfðu umskipti á peningum.15Hann gjörði sér þá svipu úr köðlum og rak alla út úr musterinu, bæði sauðina og nautin, steypti niður peningum og hratt um borðum þeirra, sem skiptu um peninga,16en sagði við þá, sem dúfurnar seldu: takið þetta héðan og gjörið ekki hús míns Föðurs að verslunarbúð.17En lærisveinum hans kom í hug að skrifað hafði verið: vandlæti vegna þíns húss uppetur mig.18Gyðingar tóku þá til orða og sögðu til hans: hvört jarteikn sýnir þú oss það, að þetta megir gjöra?19Jesús svaraði þeim og sagði: niðurbrjótið þetta musteri, en eg mun reisa það á þrim dögum.20Þá sögðu Gyðingar: musteri þetta var verið að byggja í fjörutíu og sex ár og þú mundir reisa það á þrimur dögum?21En hann talaði um musteri síns líkama.22Þar fyrir kom hans lærisveinum í hug, þá hann var risinn frá dauðum, að hann hafði þetta talað og trúðu Ritningum og því, sem Jesús hafði talað.23Meðan Jesús var í Jerúsalem á páskahátíðinni, trúðu margir á hann, af því þeir sáu þau teikn, er hann gjörði.24En Jesús trúði þeim ekki fyrir sér,25því hann þekkti alla og þurfti þess ekki að nokkur vitnaði um manninn, því hann vissi hvað með manninum bjó.

V. 1. a. Eftir að Jesús kom í Galíleu. V. 6. Mark. 7,3. V. 14. Matt. 21,12. Lúk. 19,45. V. 18. Sálm. 69,10. V. 19. Matt. 26,61. V. 22. Lúk. 24,8. V. 24, 6,64.