Múrar Jeríkó hrynja

1 Jeríkó var umlukt, rammlega víggirt og lokuð vegna Ísraelsmanna. Þar komst enginn út eða inn.
2 Þá sagði Drottinn við Jósúa:
„Ég sel Jeríkó þér í hendur, konung borgarinnar og kappa. 3 Gangið umhverfis borgina. Allir hermennirnir skulu fara einu sinni umhverfis borgina. Þetta skaltu gera í sex daga. 4 Sjö prestar skulu bera sjö hafurshorn fyrir örkinni. Sjöunda daginn skuluð þið fara sjö sinnum umhverfis borgina og þá eiga prestarnir að þeyta hafurshornin. 5 Þegar hafurshornið kveður við og þið heyrið hornablásturinn skal allt fólkið æpa mikið heróp. Þá mun borgarmúrinn hrynja til grunna og þá skal hver og einn halda upp í borgina þaðan sem hann er staddur.“
6 Jósúa Núnsson kvaddi prestana til sín og sagði við þá:
„Hefjið sáttmálsörkina upp. Sjö prestar skulu fara fyrir sáttmálsörk Drottins með sjö hafurshorn.“ 7 Því næst skipaði hann fólkinu: „Gangið nú umhverfis borgina. Fyrir örk Drottins skulu herklæddir menn fara.“
8 Það varð sem Jósúa hafði boðið fólkinu. Sjö prestar báru sjö hafurshorn fyrir Drottni og þeyttu hornin. Eftir þeim fylgdi sáttmálsörk Drottins 9 og herklæddir menn gengu á undan prestunum sem þeyttu hornin en bakvarðarsveitin gekk á eftir örkinni við hornablástur.
10 Jósúa skipaði nú fólkinu:
„Æpið ekki heróp, hefjið ekki raustina og mælið ekki orð af vörum fyrr en þann dag sem ég segi: Æpið heróp! Þá skuluð þið æpa heróp.“
11 Því næst lét hann örk Drottins fara umhverfis borgina. Þegar hún hafði farið einu sinni í kringum hana héldu þeir aftur til herbúðanna og voru þar um nóttina. 12 Morguninn eftir var Jósúa snemma á fótum. Prestarnir hófu örk Drottins upp 13 og prestarnir sjö, sem báru hafurshornin sjö á undan örkinni, þeyttu þau í sífellu. Herklæddir menn gengu á undan þeim en bakvarðarsveitin fylgdi örk Drottins. Hornin voru þeytt án afláts. 14 Þeir gengu einu sinni umhverfis borgina annan daginn og sneru því næst aftur í búðirnar. Þetta gerðu þeir í sex daga.
15 Sjöunda daginn fóru þeir á fætur þegar lýsti af degi og fóru sjö sinnum umhverfis borgina á sama hátt og áður. Aðeins þennan eina dag fóru þeir sjö sinnum umhverfis borgina.
16 Þegar prestarnir höfðu þeytt hornin í sjöunda sinn bauð Jósúa fólkinu:
„Æpið heróp! Drottinn hefur selt ykkur borgina í hendur. 17 Borgin og allt sem í henni er skal helgað banni, það tilheyrir Drottni. Aðeins skækjan Rahab og allir sem eru með henni í húsinu skulu lífi halda því að hún faldi mennina sem við sendum. 18 En forðist hið bannfærða. Ásælist hvorki né takið neitt af því sem hefur verið helgað banni því þá leiðið þið bann yfir herbúðir Ísraels og steypið þeim í glötun. 19 Allt silfur og gull og gripir úr eir og járni er helgað Drottni og á að fara í fjárhirslu Drottins.“
20 Nú æpti fólkið heróp og hafurshornin voru þeytt. Þegar fólkið heyrði hornablásturinn æpti það heróp mikið og borgarmúrinn hrundi til grunna. Fólkið fór þá inn í borgina, hver þar sem hann var staddur. Þannig unnu þeir borgina. 21 Allt sem í borginni var helguðu þeir banni, karla og konur, unga og gamla, nautgripi, sauðfé og asna, allt helguðu þeir banni með sverðseggjum.
22 Þá sagði Jósúa við mennina tvo sem höfðu njósnað um landið:
„Farið í hús skækjunnar og sækið konuna og allt hennar fólk eins og þið sóruð henni.“
23 Þá fóru báðir ungu mennirnir sem höfðu njósnað og sóttu Rahab, föður hennar, móður og bræður og allt sem hún átti. Þeir sóttu öll skyldmenni hennar og fengu þeim dvalarstað utan herbúða Ísraels.
24 Síðan brenndu þeir borgina og allt sem í henni var. En silfur og gull og gripi úr eir og járni settu þeir í fjárhirslu húss Drottins. 25 En Jósúa gaf skækjunni Rahab líf og fjölskyldu hennar og öllu sem hennar var. Hún hefur búið meðal Ísraelsmanna allt til þessa dags því að hún faldi mennina sem Jósúa sendi til að njósna um Jeríkó.
26 Þá sór Jósúa þennan eið: „Bölvaður sé hver sá frammi fyrir Drottni sem hefst handa um að endurreisa þessa borg, Jeríkó. Það skal kosta elsta son hans lífið að leggja grunn hennar og líf yngsta sonarins að setja hlið fyrir borgina.“
27 Drottinn var með Jósúa og orðstír hans barst um landið allt.