Amos 3. kafli2017-12-30T21:03:29+00:00
Amos 3. kafli

Útvalning og ábyrgð

1 Heyrið þetta orð sem Drottinn talaði gegn yður, Ísraelsmenn, og gegn öllum þeim kynstofni sem ég leiddi út af Egyptalandi:
2 Af öllum kynstofnum jarðar hef ég aðeins valið yður. Þess vegna kalla ég yður til ábyrgðar fyrir öll afbrot yðar.
3Verða tveir menn samferða
nema þeir hafi áður mælt sér mót?
4Öskrar ljón í skóginum
hafi það enga bráð?
Grenjar ljónshvolpur í bæli sínu
nema hann hafi engu náð?
5Fellur fugl til jarðar
hafi enginn hæft hann?
Hrekkur gildra í lás á jörðinni
nema eitthvað hafi í hana komið?
6Verður hafurshornið þeytt í einhverri borg
án þess að íbúarnir óttist?
Kemur böl yfir borg
hafi Drottinn ekki komið því til leiðar?
7Því að Drottinn Guð gerir ekkert
án þess að opinbera fyrirætlun sína fyrir þjónum sínum, spámönnunum.
8Ljónið öskrar – hver óttast ekki?
Drottinn Guð talar – hver spáir ekki?

Dómur yfir Samaríu

9Kallið út yfir hallirnar í Asdód
og hallirnar í Egyptalandi
og segið: Safnist saman á fjöllunum við Samaríu
og sjáið sundrungina í borginni
og ofbeldið sem þar er framið.
10Íbúarnir kunna ekki að gera það sem rétt er,
hefur Drottinn sagt.
Þeir safna auði í hallir sínar með ofbeldi og yfirgangi.
11Þess vegna segir Drottinn Guð:
Fjandmenn munu umkringja landið,
þeir munu brjóta niður varnir þínar
og hallir þínar verða rændar.
12Svo segir Drottinn:
Líkt og þegar hirðir bjargar tveimur leggjum
eða snepli af eyra úr gini ljónsins
munu Ísraelsmenn sem búa í Samaríu bjargast,
aðeins með fótagafl af rúmi og höfðagafl af bekk.
13Hlustið og vitnið um þetta gegn ætt Jakobs,
segir Drottinn Guð hersveitanna:
14Já, daginn sem ég kalla Ísraelsmenn til ábyrgðar fyrir glæpi sína
mun ég senda hegninguna yfir ölturu í Betel.
Altarishornin verða höggvin af,
þau munu falla til jarðar.
15Þá brýt ég niður vetrarhúsið og sumarhúsið,
fílabeinshúsin verða jöfnuð við jörðu
og hin stóru hús munu hverfa,
segir Drottinn.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.