Hósea 4. kafli2018-01-11T22:06:44+00:00
Hósea 4. kafli

Ákærur og afturhvarf

Ákæra á hendur Ísrael

1Hlýðið á orð Drottins, Ísraelsmenn,
því að Drottinn ákærir íbúa landsins
þar sem í landinu er engin trúfesti, kærleikur né þekking á Guði.
2Meinsæri, svik, morð, þjófnaður og hórdómur breiðist út
og blóðbað fylgir blóðbaði.
3Þess vegna skrælnar landið
og allir íbúar þess visna
ásamt dýrum merkurinnar og fuglum himinsins,
meira að segja fiskum hafsins verður svipt burt.

Ákæra gegn prestum

4Nei, enginn skal ákæra
og enginn áminna,
heldur mun ég sjálfur ákæra þig, prestur,
5og þú munt hrasa um hábjartan dag
og spámaður með þér um nætur
og móðir þín mun deyja,
6þjóð mín mun farast
því að hún hefur enga þekkingu.
Þar sem þú hefur hafnað þekkingunni
hafna ég þér sem presti fyrir mig.
Þú hefur gleymt kenningu Guðs þíns
og þess vegna gleymi ég sonum þínum.
7Því fleiri sem þeir urðu, því meira syndguðu þeir gegn mér.
Þeir skiptu á sæmd sinni og smán.
8Þeir lifa á synd þjóðar minnar
og eru sólgnir í afbrot hennar.
9En prestinum skal farnast eins og þjóðinni
og ég mun draga hann til ábyrgðar fyrir breytni sína
og endurgjalda honum verk hans.
10Þeir munu nærast en ekki verða saddir,
þeir munu hórast en þeim mun ekki fjölga
því að þeir hættu að gefa Drottni gaum
til að drýgja hór.

Drottinn fordæmir heiðna guðsdýrkun

11Hórdómur og víndrykkja sviptir þjóð mína viti,
12hún leitar ráða hjá trjádrumbum sínum
og stafur hennar á að gefa henni fyrirmæli.
Já, hórdómsandinn hefur leitt þá afvega,
hórdómur þeirra fjarlægir þá Guði sínum.
13Þeir færa sláturfórnir á fjallatindum
og brenna reykelsi á hæðum, undir eikum, öspum og terebintum
því að skuggi þeirra er notalegur.
Þess vegna hórast dætur yðar
og tengdadætur yðar halda fram hjá.
14Ég mun hvorki gera dætur yðar ábyrgar vegna þess að þær hórast
né tengdadætur yðar fyrir að halda fram hjá
því að þeir ganga sjálfir afsíðis með hórum
og halda fórnarveislur með musterisskækjum.
Þjóð, sem ekkert skilur, mun líða undir lok.
15Ef þú hórast, Ísrael,
skal Júda ekki verða sek. [
Farið því ekki til Gilgal
og farið ekki til Betaven
og sverjið ekki: „Svo sannarlega, sem Drottinn lifir.“
16Já, Ísrael er þrjóskur eins og þrjósk kýr.
Á Drottinn þá að halda Ísraelsmönnum á beit eins og lömbum í haga?
17Efraím er bundinn á klafa skurðgoða.
Látið hann afskiptalausan.
18Þegar drykkjusvalli þeirra lýkur hórast þeir,
meta skömm meira en sæmd sína.
19Stormur sviptir þeim burt með vængjum sínum
og þeir hljóta smán fyrir ölturu sín.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.