Hegning, iðrun, von

1Ég er maðurinn sem hefur þjáðst undir reiðisvipu hans.
2Mig hefur hann hrakið burt,
út í myrkur og niðdimmu.
3Gegn mér snýr hann hendi sinni
án afláts allan daginn.
4Hann hefur tálgað af mér hold og hörund
og mulið bein mín.
5Beiskju og mæðu
hefur hann hlaðið upp í kringum mig,
6hneppt mig í myrkur
eins og þá sem dánir eru fyrir löngu.
7Hann hefur múrað mig inni svo að ég kemst ekki út,
lagt á mig þunga fjötra.
8Þótt ég hrópi og kalli á hjálp
hafnar hann bæn minni.
9Hann hefur lokað vegum mínum með höggnum steinum,
gert stigu mína torfæra.
10Hann sat um mig eins og björn um bráð,
eins og ljón í launsátri.
11Hann leiddi mig afvega og tætti mig sundur,
hann gerði út af við mig.
12Hann spennti boga sinn og stillti mér upp
sem skotmarki fyrir örina.
13Hann nísti nýru mín
með sonum örvamælis síns.
14Ég varð allri þjóð minni að athlægi,
hún syngur um mig háðkvæði liðlangan daginn.
15Hann mettaði mig beiskum jurtum,
gaf mér malurt að drekka,
16lét mig bryðja möl
og þrýsti mér í duftið.
17Þú hefur rænt mig friði,
ég veit ekki lengur hvað hamingja er
18og segi: „Allur þróttur er mér horfinn
og brostin von mín til Drottins.“
19Minnstu neyðar minnar og hrakninga,
malurtarinnar og eitursins.
20Sál mín hugsar sífellt um þetta
og er döpur í brjósti mér.

Miskunn Guðs varir

21En þetta vil ég hugfesta
og þess vegna vona ég:
22 Náð Drottins er ekki þrotin,
miskunn hans ekki á enda,
23 hún er ný á hverjum morgni,
mikil er trúfesti þín.
24 Drottinn er hlutdeild mín, segir sál mín,
þess vegna vona ég á hann.
25 Góður er Drottinn þeim er á hann vona
og þeim manni er til hans leitar.
26 Gott er að bíða hljóður
eftir hjálp Drottins.
27 Gott er fyrir manninn
að bera ok í æsku.
28 Hann sitji einn og hljóður
þegar Drottinn hefur lagt það á hann.
29 Hann liggi með munninn við jörðu,
vera má að enn sé von,
30 hann bjóði þeim vangann sem slær hann,
láti metta sig smán.
31 Því að ekki útskúfar Drottinn
um alla eilífð.
32 Þótt hann valdi harmi miskunnar hann
af mikilli náð sinni.
33 Því að viljandi hrjáir hann ekki
né hrellir mannanna börn.
34 Að troða undir fótum
alla bandingja landsins,
35 að halla rétti manns
fyrir augliti Hins hæsta,
36 að beita mann ranglæti í máli hans,
skyldi Drottinn ekki sjá það?
37 Hver er sá sem bauð og það varð
án þess að Drottinn hafi ákveðið það?
38 Gengur ekki fram af munni Hins hæsta
bæði gæfa og ógæfa?
39 Hví skyldi nokkur lifandi maður kvarta
sem refsað er fyrir syndir sínar?
40 Rannsökum breytni vora og prófum
og snúum aftur til Drottins.
41 Fórnum hjarta og höndum
til Guðs í himninum.
42 Vér höfum syndgað og verið óhlýðnir,
þú hefur ekki fyrirgefið,
43 þú sveipaðir þig reiði, ofsóttir oss
og deyddir vægðarlaust.
44 Þú sveipaðir þig skýi
svo að engin bæn kemst í gegn.
45 Þú gerðir oss að skarni og sorpi
á meðal þjóðanna.
46 Allir óvinir vorir
glenntu upp ginið.
47 Geigur og gildra urðu hlutskipti vort,
eyðing og tortíming.
48 Táralækir streyma af augum mér
því að þjóð minni er tortímt.
49 Hvíldarlaust fljóta augu mín í tárum
án þess að hlé verði á,
50 uns Drottinn lítur niður af himnum
og horfir á.
51 Það sem auga mitt lítur kvelur mig
vegna allra dætra borgar minnar.
52 Þeir sem voru óvinir mínir án tilefnis
hafa elt mig eins og fugl.
53 Þeir reyndu að granda mér í gryfju
og köstuðu steinum á mig.
54 Vatn flóði yfir höfuð mitt,
ég hugsaði: „Það er úti um mig.“
55 Ég ákallaði nafn þitt, Drottinn,
úr djúpi gryfjunnar.
56 Þú heyrðir hróp mitt: „Byrg ekki eyra þitt
fyrir ákalli mínu um hjálp.“
57 Þú nálgaðist mig þegar ég hrópaði til þín,
sagðir: „Óttast ekki!“
58 Þú varðir, Drottinn, málstað minn,
leystir líf mitt.
59 Þú hefur, Drottinn, séð óréttinn sem ég er beittur,
rétt þú hlut minn.
60 Þú hefur séð hefndarþorsta þeirra,
allt ráðabrugg þeirra gegn mér,
61 þú hefur heyrt háðsyrði þeirra, Drottinn,
allt ráðabrugg þeirra gegn mér,
62 sífellt hljóðskraf andstæðinga minna
og ráðagerðir þeirra gegn mér.
63 Sjá þú, hvort sem þeir sitja eða standa
kveða þeir háðkvæði um mig.
64 Endurgjald þeim, Drottinn,
eins og þeir hafa til unnið.
65 Legg hulu yfir hjarta þeirra,
bölvan þín komi yfir þá.
66 Ofsæktu þá í reiði og afmá þá
undan himni Drottins.