Amos 9. kafli2018-01-09T03:37:59+00:00
Amos 9. kafli

Fimmta sýn: Drottinn í musterinu

1Ég sá Drottin standa við altarið og hann sagði:
Slá þú á súlnahöfuðið svo að þröskuldarnir skjálfi
og byggingin hrynji yfir höfuð þeirra allra.
Þá sem eftir verða mun ég fella með sverði.
Enginn þeirra sem flýr skal komast undan
og sá sem sleppur skal ekki bjargast.
2Þótt þeir brjótist niður í undirheima
mun hönd mín sækja þá
og þótt þeir stígi upp í himininn
mun ég steypa þeim þaðan ofan,
3þótt þeir dyljist á tindi Karmelfjalls
mun ég leita þá uppi og grípa þá,
þótt þeir feli sig fyrir mér á hafsbotni
mun ég skipa orminum þar að bíta þá.
4Þótt þeir fari í útlegð,
reknir áfram af fjandmönnum sínum,
mun ég skipa sverðinu að drepa þá þar.
Ég beini sjónum mínum að þeim,
ekki til heilla, heldur til óheilla.
5Drottinn, Guð hersveitanna,
snertir jörðina svo að hún gengur í bylgjum
og allir syrgja sem á henni búa.
Hún hækkar öll eins og fljót
og lækkar síðan aftur eins og fljót Egyptalands.
6Hann reisir hásal sinn á himni,
hefur jörðina sem grunn hvelfingar sinnar.
Hann hrópar á hafið og eys því á yfirborð jarðar.
Drottinn er nafn hans.

Útvalning og dómur

7Eruð þér Ísraelsmenn mér mætari en Kússítar?
spyr Drottinn.
Leiddi ég ekki Ísrael frá Egyptalandi,
Filistea frá Kaftór, Aramea frá Kír?
8Augu Drottins Guðs hvíla á þessu synduga konungsríki:
Ég mun afmá það af yfirborði jarðar
en samt mun ég ekki afmá niðja Jakobs að fullu,
segir Drottinn.
9Nú gef ég sjálfur skipun um að
hrista kyn Ísraels saman við allar aðrar þjóðir
eins og þegar sigti er hrist,
án þess að nokkur steinvala falli til jarðar.
10Allir syndarar þjóðar minnar munu falla fyrir sverði,
allir sem segja:
„Þú munt ekki senda oss ógæfuna,
þú munt ekki steypa henni yfir oss.“

Fyrirheit um endurreisn

11Á þeim degi mun ég endurreisa hina föllnu tjaldbúð Davíðs.
Ég mun múra upp í sprungurnar
og reisa það sem hrunið hefur.
Ég mun byggja það aftur eins og það var áður
12svo að þeir geti endurheimt það sem eftir er af Edóm
og allar þjóðir aðrar sem nafn mitt hefur verið nefnt yfir.
13Já, þeir dagar koma, segir Drottinn,
að plógmaðurinn fylgir fast á hæla sláttumannsins
og víntroðslumaðurinn á eftir sáðmanninum.
Þá mun vínberjasafinn flæða um fjöllin
og hæðirnar verða gegnvættar.
14Þá mun ég snúa við högum þjóðar minnar, Ísraels.
Þeir munu endurreisa hinar eyddu borgir og búa í þeim,
þeir munu planta víngarða og drekka vín úr þeim,
gera aldingarða og neyta ávaxta þeirra.
15Ég mun gróðursetja þá í eigin jarðvegi
og þeir skulu aldrei framar verða upprættir
úr gróðurmoldinni sem ég gaf þeim,
segir Drottinn, Guð þinn.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.