Orðskviðirnir 4. kafli2017-12-30T21:02:22+00:00
Orðskviðirnir 4. kafli

Ávinningur spekinnar

1Heyrið, synir, áminningu föður yðar
og hlustið á svo að þér öðlist skilning.
2Góðan lærdóm veiti ég yður,
hafnið ekki tilsögn minni.
3Þegar ég var sonur í föðurhúsum,
viðkvæmt einkabarn móður minnar,
4þá kenndi faðir minn mér og sagði við mig:
„Hjarta þitt haldi fast við orð mín,
varðveittu fyrirmæli mín og þá muntu lifa.
5Aflaðu þér visku, aflaðu þér hygginda.
Gleymdu ekki orðum mínum og víktu ekki frá þeim.
6Hafnaðu ekki viskunni, hún mun varðveita þig,
elskaðu hana og þá mun hún vernda þig.
7Viska er fyrir öllu, aflaðu þér visku,
kostaðu öllu til að afla þér hygginda.
8Hafðu hana í hávegum og þá mun hún hefja þig,
faðmaðu hana og hún mun verða þér til sæmdar.
9Hún mun setja unaðslegan sveig á höfuð þér
og sæma þig glæstri kórónu.“
10Hlustaðu, sonur minn, og gefðu gaum að orðum mínum,
þá verða æviár þín mörg.
11Ég vísa þér veg spekinnar
og leiði þig á braut ráðvendninnar,
12á göngunni verður leið þín ekki þröng
og hlaupirðu muntu ekki hrasa.
13Varðveittu leiðsögnina og slepptu henni ekki,
varðveittu hana því að hún er líf þitt.
14Farðu ekki brautir ranglátra
og gakktu ekki á vegi vondra manna.
15Sneiddu hjá honum, farðu hann ekki,
snúðu frá honum og farðu fram hjá.
16Þeir geta ekki sofið nema þeir hafi gert illt
og þeim kemur ekki dúr á auga nema þeir hafi fellt einhvern,
17brauð glæpsins eta þeir
og drekka vín ofbeldisins.
18Gata réttlátra er eins og bjartur árdagsljómi,
því bjartari sem nær líður hádegi.
19Vegur ranglátra er eins og niðamyrkur,
þeir vita ekki um hvað þeir hrasa.
20Sonur minn, gefðu gaum að máli mínu,
hneigðu eyra þitt að orðum mínum.
21Láttu þau ekki víkja frá augum þínum,
varðveittu þau innst í hjarta þínu
22 því að þau eru líf þeim sem hljóta þau
og lækning öllum líkama þeirra.
23 Varðveit hjarta þitt framar öllu öðru
því að þar eru uppsprettur lífsins.
24 Haltu munni þínum fjarri fláum orðum
og vörum þínum fjarri lygamálum.
25 Beindu augum þínum fram á við
og sjónum þínum að því sem fram undan er.
26 Veldu fótum þínum beina braut,
þá verður ætíð traust undir fótum.
27 Víktu hvorki til hægri né vinstri,
haltu fæti þínum frá illu.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.