Eyðing Edómíta

1Vitrun Óbadía.
Tíðindi hafa borist frá Drottni
og boðberi er sendur til þjóðanna:
„Komum nú. Herjum á Edómíta.“
Svo segir Drottinn Guð um Edóm:
2Þig geri ég smæstan meðal þjóða,
þú verður fyrirlitinn mjög.
3Hroki hjarta þíns hefur dregið þig á tálar,
þú sem býrð í klettaskorum,
átt dvalarstað á hæðum uppi
og segir í hjarta þínu:
„Hver getur steypt mér til jarðar?“
4Þótt þú svífir eins hátt og örninn
og gerir þér hreiður meðal stjarnanna
mun ég steypa þér niður, segir Drottinn.
5Komi þjófar að þér,
ræningjar að næturþeli,
þá stela þeir ekki umfram þörf sína.
Komi vínyrkjumenn til þín
munu þeir eftirláta þér eftirtínsluna.
Hve algjör er eyðing þín orðin.
6Hve þaulrannsakaður verður Esaú
og fólgin auðæfi hans leituð uppi.
7Allir bandamenn þínir hrekja þig
allt að landamærunum,
lagsmenn þínir villa um fyrir þér
og bera þig ofurliði
og mötunautar þínir
hafa lagt snörur fyrir þig.
8Á þeim degi, segir Drottinn,
eyði ég hinum vitru í Edóm
og viskunni af fjalli Esaú.
Og hyggindi hans mun þrjóta.
9Kappar þínir, Teman, skulu skelfast.
Á fjalli Esaú mun enginn lifa manndrápin af.
10Sakir ofbeldisverka þinna
gegn Jakob, bróður þínum,
mun smánin hvolfast yfir þig
og þú tortímast að eilífu.
11Þann dag sem þú lést afskiptalaust
að aðkomumenn flyttu burt eigur hans,
þegar útlendingar héldu inn um hlið hans
og vörpuðu hlutkesti um Jerúsalem,
varst þú sem einn af þeim.
12Horfðu ekki meinfýsinn
á örlög bróður þíns
á degi ógæfu hans.
Hlakkaðu ekki
yfir þjóð Júda
á degi tortímingar hennar.
Sparaðu þér stóryrði
á degi angistar hennar.
13Ryðstu ekki inn um hlið þjóðar minnar
á degi glötunar hennar.
Hlakkaðu ekki með hinum yfir óförum hennar
á degi glötunar hennar,
seilstu ekki eftir eigum hennar
á degi glötunar hennar.
14Nem eigi staðar við vegamótin
til að drepa flóttamenn hennar
og framseldu ekki þá er undan komast
á degi neyðarinnar.
15Dagur Drottins
vofir yfir öllum þjóðum.
Eins og þú breyttir við aðra,
þannig verður breytt við þig.
Verk þín munu koma sjálfum þér í koll.
16Eins og þér drukkuð
á helgu fjalli mínu,
þannig munu allar þjóðir ævinlega drekka.
Þær munu drekka og drekka stórum
og verða eins og þær hefðu aldrei verið til.

Sigur Ísraels

17En á Síonarfjalli munu menn komast af
og það skal verða heilagt
og Jakobsniðjar munu endurheimta eigur sínar.
18Ætt Jakobs verður sem eldur
og ætt Jósefs sem bál
en ætt Esaú verður að hálmi.
Þeir munu kveikja í honum og eyða
og enginn mun undan komast af niðjum Esaú
því að svo hefur Drottinn mælt.
19Sunnlendingar munu fá fjall Esaú til eignar
og íbúar vesturhlíðanna Filisteu.
Og þeir munu eignast Efraímsland og Samaríuhérað
en Benjamín Gíleað.
20Brottfluttir hermenn Ísraels
munu taka lönd Kanverja til eignar
allt til Sarefta
og útlagarnir frá Jerúsalem,
sem dveljast í Sefarad,
munu eignast borgir Suðurlandsins.
21Sem bjargvættir munu þeir halda
upp til Síonarfjalls
og dæma þaðan fjall Esaú
og Drottinn hlýtur konungdæmið.