Landareign Drottins og afnotaréttur Levíta og presta

1 Þegar þið skiptið landinu með hlutkesti í erfðahluti skuluð þið taka hluta af því í afgjald handa Drottni. Það er heilög landspilda, 25.000 álnir á lengd og 20.000 á breidd. Öll þessi spilda skal vera heilög, á allar hliðar. 2 Af henni skal ferhyrnd skák, 500 álnir á hverja hlið, vera eign helgidómsins ásamt 50 álna bithaga allt umhverfis. 3 Af þessu afmarkaða svæði skuluð þið mæla spildu, 25.000 álnir á lengd og 10.000 á breidd. Þar skal helgidómurinn standa. 4 Þetta er heilagur hluti af landinu. Hann skal vera prestunum sem gegna þjónustu í helgidóminum til nytja, þeim sem nálgast Drottin til að þjóna honum. Þar skulu þeir fá land fyrir hús sín og haga fyrir búfé sitt. 5 Levítarnir, sem gegna þjónustu í musterinu, skulu fá landspildu sem er 25.000 álnir á lengd og 10.000 á breidd. Hún skal vera eign þeirra ásamt borgum til að búa í. 6 Landspilda sem er 5000 álna breið og 25.000 álna löng, með fram hinni heilögu landspildu, skal vera eign borgarinnar. Hún skal vera í eigu allra Ísraelsmanna. 7 Landshöfðinginn skal fá jarðeign báðum megin við hinu heilögu landspildu og jarðeign borgarinnar, með fram hinni heilögu spildu og eign borgarinnar, vestan megin í vesturátt og austan megin í austur. 8 Lengd hennar skal svara til lengdar landskika eins ættbálks, frá landamærunum vestan megin að landamærunum austan megin. Þetta skal vera jarðeign hans í Ísrael. Höfðingjar mínir skulu því ekki kúga þjóð mína framar, heldur munu þeir fá Ísraelsmönnum landið, hverjum ættbálki fyrir sig.

Höfðingjar Ísraels áminntir

9 Svo segir Drottinn Guð: Nú er nóg komið, höfðingjar Ísraels. Afnemið ofbeldi og kúgun. Iðkið rétt og réttlæti. Hættið að hrekja þjóð mína af eignarjörðum hennar, segir Drottinn Guð.
10 Þið skuluð nota rétta vog, rétta efu og rétt bat. 11 Efa og bat skulu vera jöfn að máli svo að bat taki einn tíunda úr gómer og efa einn tíunda úr gómer. Mál beggja skal miðast við gómer. 12 Einn sikill skal vera tuttugu gerur. Fimm siklar skulu vera fimm siklar og tíu siklar tíu siklar og fimmtíu siklar skulu vera ein mína.
13 Þetta er afgjaldið sem þið skuluð greiða: Einn sjötta úr efu af hverjum gómer hveitis og einn sjötta efu af hverjum gómer byggs. 14 Ákvæði um olíu eru: Olía er mæld með bat, tíu böt eru einn gómer því að tíu böt eru einn kór. Greiða skal tíunda hluta úr bat af hverjum kór.
15 Greiða skal eitt lamb af hjörð með tvö hundruð fjár fyrir ættbálka Ísraels til kornfórnar, brennifórnar og heillafórnar og til friðþægingar fyrir þá, segir Drottinn Guð.
16 Allir landsmenn skulu greiða þetta afgjald til landshöfðingjans yfir Ísrael. 17 En landshöfðingjanum ber að sjá um brennifórn, kornfórn og dreypifórn á hátíðum, tunglkomudögum og hvíldardögum, á öllum hátíðarsamkomum Ísraelsmanna. Hann skal láta færa syndafórn, kornfórn, brennifórn og heillafórnir til að friðþægja fyrir Ísraelsmenn.

Hátíðir

18 Svo segir Drottinn Guð: Á fyrsta degi fyrsta mánaðarins skaltu sækja lýtalaust naut úr nautgripahjörðinni og hreinsa helgidóminn af synd. 19 Presturinn skal taka nokkuð af blóði dýrsins, sem ætlað er til syndafórnar, og bera það á dyrastafi hússins, á fjögur horn fótstalls altarisins og á dyrastafi hliðsins að innri forgarðinum. 20 Eins skaltu gera á sjöunda degi mánaðarins vegna þeirra sem syndgað hafa án ásetnings eða af vanþekkingu. Þið skuluð friðþægja fyrir húsið.
21 Þið skuluð halda páskahátíð fjórtánda dag fyrsta mánaðarins. Í sjö daga skal borða ósýrt brauð. 22 Á þeim degi skal landshöfðinginn reiða fram naut til syndafórnar fyrir sjálfan sig og allt fólkið í landinu. 23 Hann skal einnig færa Drottni brennifórn þessa sjö hátíðardaga. Hann skal reiða fram sjö lýtalaus naut og sjö lýtalausa geithafra á hverjum degi þessa sjö daga og geithafur í syndafórn hvern dag. 24 Einnig skal hann leggja fram eina efu í kornfórn með hverju nauti og eina efu með hverjum geithafri og eina hín af olíu með hverri efu.
25 Á hátíðinni fimmtánda dag sjöunda mánaðarins skal hann reiða þetta sama fram til syndafórnar, brennifórnar og kornfórnar og það sama af olíu í sjö daga.