Orðskviðirnir 16. kafli2017-12-30T21:02:27+00:00
Orðskviðirnir 16. kafli

1Fyrirætlanir hjartans eru á mannsins valdi
en svar tungunnar kemur frá Drottni.
2Maðurinn telur alla vegu sína vammlausa
en Drottinn reynir ásetning hans.
3Fel Drottni verk þín
og þá bera áform þín árangur.
4Allt hefur Drottinn skapað í ákveðnum tilgangi,
eins hinn rangláta vegna óheilladagsins.
5Sérhver hrokagikkur er Drottni andstyggð,
vissulega sleppur hann ekki við refsingu.
6Misgjörðir afplána menn með tryggð og vináttu,
að óttast Drottin forðar frá illu.
7Ef Drottni geðjast breytni manns
snýr hann jafnvel óvinum hans til liðs við hann.
8Betra er lítið með réttu
en mikill arður með röngu.
9Hjarta mannsins velur leið hans
en Drottinn stýrir skrefum hans.
10Goðsvar er á vörum konungsins,
í dómi skeikar honum ekki.
11Rétt vog og reisla koma frá Drottni
en lóðin á vogarskálunum [ eru hans verk.
12Ranglætisverk eru konungum andstyggð
því að hásætið er reist á réttlæti.
13Sannleiksorð eru yndi konunga,
hinn hreinskilni fellur þeim í geð.
14Konungsreiði er fyrirboði dauðans
en vitur maður sefar hana.
15Í brosi konungs felst líf
og hylli hans er sem regnský á vori.
16Hve miklu betra er að afla sér visku en gulls
og ágætara að afla sér skynsemi en silfurs?
17Háttur hreinskilinna er að forðast illt,
líf sitt varðveitir sá sem gætir breytni sinnar.
18Dramb er falli næst,
hroki veit á hrun.
19Betra er að vera hógvær með lítillátum
en deila feng með dramblátum.
20Vel farnast þeim sem vel rækir erindi sitt
og sæll er sá sem treystir Drottni.
21Hinn vitri leitar ráða spekinga
og vel mælt orð eykur fræðslu.
22 Skynsemin er lífslind þeim sem hana á
en heimskan er refsing heimskra.
23 Hjarta spekingsins ræður orðum hans
og eykur fræðsluna á vörum hans.
24 Vingjarnleg orð eru hunang,
sæt fyrir góminn, lækning fyrir beinin.
25 Margur vegur virðist greiðfær
en reynist þó heljarslóð.
26 Hungur erfiðismannsins knýr hann til verka
því að sulturinn rekur á eftir honum.
27 Varmennið bruggar vélráð,
orð hans eru sem brennandi eldur.
28 Vélráður maður kveikir illdeilur
og rógberinn veldur vinaskilnaði.
29 Ofbeldismaðurinn ginnir náunga sinn
og leiðir hann í ófæru.
30 Hálflukt augu vitna um ill áform,
herptar varir um unnið ódæði.
31 Gráar hærur eru heiðurskóróna,
á vegi réttlætis öðlast menn hana.
32 Sá sem er seinn til reiði er betri en kappi
og sá sem stjórnar geði sínu er meiri en sá sem vinnur borgir.
33 Í skikkjufellingu eru teningarnir hristir
en Drottinn ræður hvað upp kemur.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.