1 Ljóð. Asafssálmur.
2Guð, ver eigi hljóður,
ver eigi þögull, ó Guð, né aðgerðalaus.
3Því sjá, óvinir þínir gera hark
og hatursmenn þínir reigja sig.
4Þeir sitja á svikráðum við lýð þinn,
leggja á ráðin gegn þeim sem þú verndar.
5Þeir segja: „Komið. Vér skulum afmá þá sem þjóð
svo að nafns Ísraels verði ekki framar minnst.“
6Þeir voru einhuga um ráðagerð sína
og gerðu bandalag gegn þér:
7Edómítar og Ísmaelítar,
Móabítar og Hagrítar,
8Gebal og Ammón og Amalek,
Filistear ásamt Týrusbúum.
9Assúr sameinast þeim einnig
og styður Lots niðja með armi sínum.
10Farðu með þá eins og Midían,
eins og Sísera, eins og Jabín við Kísonlæk,
11þeim var gereytt við Endór,
þeir urðu áburður á jörðina.
12Farðu með leiðtoga þeirra eins og Óreb og Seeb,
alla höfðingja þeirra eins og Seba og Salmúna
13sem sögðu: „Vér skulum vinna haglendi Guðs.“
14Guð minn, ger þá sem skrælnaða þistla,
sem hálmleggi fyrir vindi.
15Eins og eldur, sem brennir skóginn,
og logi, sem svíður fjöllin,
16svo skaltu elta þá með ofviðri þínu,
skelfa þá með fellibyl þínum.
17Lát andlit þeirra roðna af skömm
svo að þeir leiti nafns þíns, Drottinn.
18Lát þá verða til skammar og skelfast um aldur,
lát þá tortímast með skömm
19svo að þeir játi að þú, sem berð nafnið Drottinn,
þú einn ert Hinn hæsti yfir allri jörðinni.