Þakkarsálmur

1Drottinn, þú ert minn Guð.
Ég vegsama þig, ég lofa nafn þitt
því að þú hefur unnið furðuverk,
framkvæmt löngu ráðin ráð [
sem í engu brugðust.
2Því að þú gerðir borgina að grjóthrúgu,
hið rammgera virki að rúst,
hallir hrokafullra eru ekki framar virki,
það verður aldrei endurreist.
3Þess vegna mun voldug þjóð heiðra þig,
borg ofstopafullra þjóða sýna þér lotningu,
4því að þú varst vörn lítilmagnans,
vörn hins þurfandi í þrengingum hans,
skjól í skúrum, hlíf í hita.
Andi ofríkismanna er eins og kuldaskúrir að vetri,
5breyskja í skrælnuðu landi.
Þú lægir háreysti hrokafullra.
Eins og breyskja hverfur fyrir skugga af skýi
hljóðnar söngur ofríkismannanna.

Veisla á Síonarfjalli

6Drottinn allsherjar mun á þessu fjalli
búa öllum þjóðum veislu,
veislu með réttum fljótandi í olíu
og með dreggjavíni, með réttum úr olíu og merg
og skírðu dreggjavíni.
7Á þessu fjalli, fyrir framan fortjaldið,
sem er hula öllum þjóðum
og forhengi öllum lýðum,
8mun hann afmá dauðann að eilífu.
Drottinn Guð mun þerra tárin af hverri ásjónu
og afmá smán lýðs síns af allri jörðinni
því að Drottinn hefur talað.
9Á þeim degi verður sagt:
Þessi er Guð vor sem vér höfum vonað á
og hann mun frelsa oss.
Þessi er Drottinn sem vér höfum vonað á,
fögnum og gleðjumst yfir hjálp hans
10því að hönd Drottins mun hvíla á þessu fjalli.

Gegn Móab

Móab verður fótum troðinn þar sem hann er,
líkt og hálmur sem er troðinn niður í forarvilpu.
11Þótt hann teygi út hendurnar í forinni
eins og sundmaður gerir á sundi
mun Drottinn lægja hroka hans
þrátt fyrir fálm handa hans.
12Háa virkismúra þína mun hann brjóta niður,
hann mun jafna þá við jörðu,
gera þá að dufti.