Jeremía 43. kafli 2018-01-19T23:25:34+00:00
Jeremía 43. kafli

Förin til Egyptalands

1 Jeremía lauk nú við að flytja öllu fólkinu þessi orð frá Drottni, Guði, en Drottinn, Guð þeirra, hafði sent hann með þau til þeirra. 2 Þá tók Asarja Hósajason til máls og talaði við Jeremía ásamt Jóhanan Kareasyni og öllum hrokagikkjunum. Þeir sögðu við Jeremía: „Það sem þú segir er lygi. Það var ekki Drottinn, Guð vor, sem sendi þig með þessi boð: Farið ekki til Egyptalands til að leita þar hælis. 3 Nei, það er Barúk Neríason sem æsir þig upp gegn oss til þess að selja oss Kaldeum á vald svo að þeir geti drepið oss eða flutt oss í útlegð til Babýlonar.“
4 Hvorki Jóhanan Kareason, herforingjarnir né allt hitt fólkið hlýddi boði Drottins um að vera um kyrrt í Júda. 5 En Jóhanan Kareason og allir herforingjarnir söfnuðu saman þeim sem eftir voru af Júdamönnum og höfðu snúið heim frá þeim þjóðum sem þeir höfðu verið hraktir til og komið til Júda til að setjast þar að. 6 Það voru karlar, konur og börn, einnig konungsdæturnar og allir hinir sem Nebúsaradan, foringi lífvarðarins, hafði látið vera um kyrrt hjá Gedalja Ahíkamssyni, Safanssonar. Jeremía spámaður og Barúk Neríason voru á meðal þeirra. 7 Þeir héldu því næst til Egyptalands af því að þeir hlýddu ekki boði Drottins og fóru til Takpanes.

Nebúkadresari spáð sigri á Egyptum

8 Orð Drottins kom til Jeremía í Takpanes: 9 Taktu þér í hönd nokkra stóra steina og grafðu þá niður í leirinn milli múrsteinanna í stéttinni framan við höll faraós í Takpanes í viðurvist nokkurra Júdamanna 10 og segðu við þá: Svo segir Drottinn hersveitanna, Guð Ísraels: Ég sendi eftir þjóni mínum, Nebúkadresari, konungi í Babýlon. Ég mun koma hásæti hans fyrir á þessum steinum sem ég hef grafið niður og hann mun þenja hásætishimin sinn út yfir þá. 11 Hann mun koma og sigra Egyptaland: Sá sem dauðanum er ætlaður fer til dauðans, sá sem útlegð er ætlaður fer í útlegð, sá sem sverði er ætlaður fer til sverðsins. 12 Hann mun kveikja í húsum guða Egyptalands, brenna guðina til ösku eða flytja þá í útlegð. Hann mun aflúsa Egyptaland, eins og smali sem tínir lýsnar af yfirhöfn sinni, og halda þaðan óáreittur. 13 Hann mun brjóta steinsúlurnar í Bet Semes í Egyptalandi og brenna hús guða Egyptalands til ösku.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.