Sálmarnir 149. kafli 2017-12-30T21:02:22+00:00
Sálmarnir 149. kafli

1Hallelúja.
Syngið Drottni nýjan söng,
lofsöngur hans hljómi í söfnuði trúfastra.
2Ísrael gleðjist yfir skapara sínum,
börn Síonar fagni konungi sínum,
3lofi nafn hans með dansi,
flytji honum lofgjörð með bumbu og gígju.
4Því að Drottinn hefur þóknun á lýð sínum,
krýnir hrjáða sigri.
5Hinir trúuðu fagni í dýrðarljóma,
hrópi gleðióp í hvílum sínum
6með lofgjörð Guðs á tungu
og tvíeggjað sverð í hendi
7til hefnda á öðrum þjóðum,
refsingar framandi þjóðflokkum,
8til að hlekkja konunga þeirra
og leggja höfðingja þeirra í járn.
9Þeir skulu fullnægja á þeim skráðum dómi.
Það er til vegsemdar öllum sem honum eru trúir.
Hallelúja.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.