Ísrael refsað

1Gleðstu ekki, Ísrael,
fagnaðu ekki eins og aðrar þjóðir
því að þú hóraðist, yfirgafst Guð þinn.
Þú girntist skækjulaun
á hverjum þreskivelli.
2Þreskivöllur og vínpressa skulu ekki fæða þá
og vínuppskeran bregst þeim.
3Þeir fá ekki að búa í landi Drottins,
Efraím mun hverfa aftur til Egyptalands
og neyta óhreinnar fæðu í Assýríu.
4Ekki færa þeir Drottni vín að dreypifórn
og sláturfórnir þeirra gleðja hann ekki.
Brauðið verður þeim sem sorgarbrauð,
hver sem þess neytir verður óhreinn.
Brauðið seður aðeins hungur þeirra
en kemur ekki í hús Drottins.
5Hvað ætlið þér að gera á löghelgum,
á hátíðardögum Drottins?
6Þótt þeir sleppi frá eyðingunni
safnar Egyptaland þeim saman,
Memfis grefur þá,
hversu verðmætt sem silfur þeirra er
vex illgresi yfir það,
í tjöldum þeirra vaxa þyrnar.
7Dagar uppgjörsins eru komnir,
dagar endurgjaldsins eru komnir,
Ísrael mun sjá það.
„Spámaðurinn er kjáni,
andans maður ruglaður.“
Af því að misgjörð þín er mikil
verður fjandskapurinn mikill.
8Spámaðurinn er vörður Efraíms með Guði mínum,
þeir leggja fyrir hann gildrur hvert sem hann fer,
hann verður fyrir fjandskap í húsi Guðs síns. [
9Þeir hafa grafið honum djúpa gröf
eins og á dögum Gíbeu.
Drottinn minnist sektar þeirra,
vitjar synda þeirra.

Efraím hafnað

10Ég fann Ísrael
eins og vínber í eyðimörkinni,
sem snemmsprottinn ávöxt á fíkjutré
sá ég feður yðar.
Þeir komu til Baals Peórs,
helguðu sig hinum svívirðilega
og urðu viðurstyggilegir
eins og sá sem þeir elskuðu.
11Efraím líkist fugli,
sæmd hans flögrar burt,
fæðingar, þungun og getnaður verða úr sögunni.
12Þótt þeir ali upp börn sín
geri ég þá barnlausa
og enginn maður verður eftir.
Vei þeim þegar ég sný frá þeim.
13Ég sá Efraím
sem pálmalund á engi.
Nú verður Efraím að senda börn sín til slátrara.
14Gefðu þeim, Drottinn.
Hvað áttu að gefa þeim?
Gefðu þeim móðurlíf óbyrju
og uppþornuð brjóst.
15Öll illska þeirra birtist í Gilgal,
þar fékk ég hatur á þeim.
Vegna illskuverka þeirra
mun ég reka þá úr húsi mínu.
Ég mun ekki elska þá framar,
allir höfðingjar þeirra eru uppreisnarmenn.
16Efraím var felldur,
rót hans er skrælnuð,
hann ber engan ávöxt.
Ef þeir eignast afkvæmi
mun ég deyða elskuð börn þeirra.
17Guð minn mun hafna þeim
því að þeir hafa ekki hlýtt á hann
og þeir munu ráfa um meðal framandi þjóða.