Verið með sama hugarfari og Kristur

1 Fyrst Kristur veitir kjark, fyrst kærleikur hans uppörvar, fyrst andi hans skapar samfélag, fyrst þar ríkir hlýja og samúð 2 gerið þá gleði mína fullkomna með því að vera einhuga, hafa sama kærleika, einn hug og eina sál. 3 Gerið ekkert af eigingirni eða hégómagirnd. Verið lítillát og metið hvert annað meira en ykkur sjálf. 4 Lítið ekki aðeins á eigin hag heldur einnig annarra. 5 Verið með sama hugarfari sem Kristur Jesús var.
6Hann var í Guðs mynd.
En hann fór ekki með það sem feng sinn að vera Guði líkur.
7Hann svipti sig öllu, tók á sig þjóns mynd
og varð mönnum líkur.
Hann kom fram sem maður,
8lægði sjálfan sig
og varð hlýðinn allt til dauða,
já, dauðans á krossi.
9Fyrir því hefur og Guð
hátt upp hafið hann
og gefið honum nafnið,
sem hverju nafni er æðra,
10til þess að fyrir nafni Jesú
skuli hvert kné beygja sig á himni, jörðu og undir jörðu
11og sérhver tunga játa Guði föður til dýrðar:
Jesús Kristur er Drottinn.

Eins og ljós í heiminum

12 Þess vegna, mín elskuðu, sem ætíð hafið verið hlýðin, vinnið nú að sáluhjálp ykkar með ugg og ótta eins og þegar ég var hjá ykkur, því fremur nú þegar ég er fjarri. 13 Því að það er Guð sem verkar í ykkur bæði að vilja og að framkvæma sér til velþóknunar.
14 Gerið allt án þess að mögla og hika 15 til þess að þið verðið óaðfinnanleg og hrein, flekklaus Guðs börn meðal rangsnúinnar og gerspilltrar kynslóðar sem þið skínið hjá eins og ljós í heiminum. 16 Haldið fast við orð lífsins mér til hróss á degi Krists. Þá hef ég ekki hlaupið til einskis né erfiðað til ónýtis.
17 Enda þótt blóði mínu verði úthellt við fórnarþjónustu mína þegar ég ber trú ykkar fram fyrir Guð, þá gleðst ég og samgleðst ykkur öllum. 18 Af hinu sama skuluð þið einnig gleðjast og samgleðjast mér.

Tveir trúir samverkamenn

19 En ég vona að Drottinn Jesús geri mér bráðum fært að senda Tímóteus til ykkar til þess að mér verði einnig hughægra þá er ég fæ að vita um hagi ykkar. 20 Ég hef engan honum líkan sem lætur sér eins einlæglega annt um hagi ykkar. – 21 Allir leita þess sem sjálfra þeirra er en ekki þess sem Krists Jesú er. – 22 En þið vitið hvernig hann hefur reynst, að hann hefur þjónað að boðun fagnaðarerindisins með mér eins og barn með föður sínum. 23 Ég vona að geta sent hann jafnskjótt og ég sé hvað um mig verður. 24 En ég ber það traust til Drottins að ég muni og bráðum koma sjálfur.
25 Ég taldi það og nauðsynlegt að senda til ykkar Epafrodítus, bróður minn, samverkamann og samherja, sem þið senduð til að annast um mig. 26 Hann hefur þráð ykkur öll og liðið illa út af því að þið höfðuð heyrt að hann hefði orðið sjúkur. 27 Já, sjúkur varð hann, að dauða kominn, en Guð miskunnaði honum og ekki einungis honum heldur og mér til þess að ég skyldi eigi hafa hryggð á hryggð ofan. 28 Þess vegna er mér enn hugleiknara að senda hann heim til þess að þið verðið aftur glöð er þið sjáið hann og mér verði hughægra. 29 Takið því á móti honum í nafni Drottins með miklum fögnuði og hafið slíka menn í heiðri. 30 Hann var að vinna fyrir Krist. Þess vegna var hann að dauða kominn. Hann lagði líf sitt í hættu til þess að bæta upp þá þjónustu sem þið gátuð ekki veitt mér.