Sálmarnir 140. kafli2017-12-30T21:02:18+00:00
Sálmarnir 140. kafli

1 Til söngstjórans. Davíðssálmur.
2Bjarga mér, Drottinn, frá illmennum,
vernda mig fyrir ofbeldismönnum,
3fyrir þeim sem hafa illt í hyggju
og daglega efna til ófriðar.
4Þeir hvessa tungur sínar eins og höggormar,
nöðrueitur er undir vörum þeirra. (Sela)
5Varðveit mig, Drottinn, fyrir hendi óguðlegra,
vernda mig fyrir ofbeldismönnum,
fyrir þeim sem hyggjast bregða fyrir mig fæti.
6Ofstopamenn lögðu gildrur fyrir mig,
illviljaðir þöndu út net sín,
lögðu snörur fyrir mig við veginn. (Sela)
7Ég sagði við Drottin: Þú ert Guð minn.
Ljá eyra grátbeiðni minni.
8Drottinn, Guð minn, þú ert mér máttug hjálp,
þú skýlir höfði mínu á orrustudegi.
9Drottinn, uppfyll eigi óskir hins óguðlega,
lát vélráð hans ekki takast. (Sela)
10Þeir sem sitja um mig skulu ekki reigja höfuðið,
formælingarnar á vörum þeirra komi yfir þá.
11Yfir þá rigni eldsglóðum,
þeir falli í gryfjur sem þeir komast ekki upp úr.
12Rógberi skal ekki fá að lifa í landinu,
ofbeldismanninn skal ógæfan elta með barsmíð.
13Ég veit að Drottinn flytur mál hins umkomulausa,
rekur réttar snauðra.
14Réttlátir skulu lofa nafn þitt,
hreinlyndir búa fyrir augliti þínu.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.