Síðari konungabók 20. kafli 2017-12-30T21:01:06+00:00
Síðari konungabók 20. kafli

Jesaja læknar Hiskía

1 Um þessar mundir veiktist Hiskía og var að dauða kominn. Spámaðurinn Jesaja Amotsson kom þá til hans og sagði: „Svo segir Drottinn: Ráðstafaðu eigum þínum því að þú munt deyja, þú munt ekki halda lífi.“ 2 Hiskía sneri sér þá til veggjar, bað til Drottins og sagði: 3 „Minnstu þess nú, Drottinn, að ég hef breytt í trúfesti og af einlægni fyrir augliti þínu og gert það sem gott er í augum þínum.“ Og Hiskía grét ákaflega.
4 En áður en Jesaja var kominn út úr miðforgarði hallarinnar kom orð Drottins til hans svohljóðandi: 5 „Snúðu aftur og segðu við Hiskía, leiðtoga þjóðar minnar: Svo segir Drottinn, Guð Davíðs, forföður þíns: Ég hef heyrt bæn þína og ég hef séð tár þín. Ég mun lækna þig. Á þriðja degi skaltu ganga í musteri Drottins. 6 Ég mun lengja ævi þína um fimmtán ár. Ég mun bjarga þér og þessari borg úr höndum Assýríukonungs og ég mun vernda þessa borg vegna sjálfs mín og vegna Davíðs, þjóns míns.“ 7 Því næst sagði Jesaja: „Komið með fíkjudeig.“ Var það sótt og lagt við kýli konungs svo að hann læknaðist.
8 Þá spurði Hiskía Jesaja: „Hvað er til marks um að Drottinn muni lækna mig svo að ég geti gengið í musteri Drottins á þriðja degi?“ 9 Jesaja svaraði: „Þetta skaltu hafa til marks um að Drottinn muni gera það sem hann hefur heitið: Á skugginn að færast fram eða aftur um tíu stig?“ 10 Hiskía svaraði: „Það er auðvelt fyrir skuggann að færa sig fram um tíu stig. Nei, hann á að færast aftur um tíu stig.“ 11 Jesaja spámaður hrópaði þá til Drottins sem lét skuggann færast aftur um þau tíu stig sem hann hafði farið niður eftir þrepum Akasar.

Sendiboðar frá Babýlon

12 Um þetta leyti sendi Merodak Baladan Baladansson, konungur í Babýlon, bréf og gjöf til Hiskía af því að hann hafði frétt af veikindum hans. 13 Hiskía gladdist yfir þessu og sýndi sendiboðunum alla fjárhirslu sína, silfrið, gullið, balsamið og úrvalsolíuna, vopnabúr sitt og allt annað sem varðveitt var í fjárhirslu hans. Í höll hans eða ríki var enginn sá hlutur sem hann sýndi þeim ekki.
14 Jesaja spámaður kom þá til Hiskía konungs og spurði: „Hvað vildu þessir menn og hvaðan komu þeir?“ Hiskía svaraði: „Þeir komu frá fjarlægu landi, alla leið frá Babýlon.“ 15 Þá spurði Jesaja: „Hvað sáu þeir í húsi þínu?“ Hiskía svaraði: „Þeir sáu allt sem er í húsi mínu. Í fjárhirslum mínum er enginn sá hlutur sem ég sýndi þeim ekki.“ 16 Þá sagði Jesaja við Hiskía: „Hlýddu á orð Drottins: 17 Sá tími mun koma að allt, sem er í húsi þínu, og allt, sem forfeður þínir hafa safnað til þessa dags, verður flutt til Babýlonar. Ekkert verður eftir, segir Drottinn. 18 Nokkrir af sonum þínum, niðjum þínum, sem þú átt eftir að eignast, verða teknir og gerðir að hirðsveinum í höll Babýloníukonungs.“ 19 Hiskía svaraði Jesaja og sagði: „Gott er það orð sem þú hefur flutt mér frá Drottni.“ En hann hugsaði með sér: „Það verður þó friður og festa á meðan ég lifi.“

Hiskía deyr

20 Það sem ósagt er af sögu Hiskía og afrekum hans, af tjörninni og vatnsleiðslunni, sem hann lét gera, og því hvernig hann lét leiða vatn inn í borgina, er skráð í annála Júdakonunga. 21 Hiskía var lagður til hvíldar hjá feðrum sínum. Manasse, sonur hans, varð konungur eftir hann.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.