Þriðja ræða Elíhú

1 Elíhú tók til máls og sagði:
2Telurðu réttmætt að segja:
„Ég hef rétt fyrir mér, ekki Guð,“
3og spyrja: „Hvað gagnar það mér,
hvaða ávinning hef ég af því að syndga ekki?“
4Nú skal ég svara þér
og vinum þínum með þér:
5Horfðu til himins og sjáðu,
virtu fyrir þér skýin hátt fyrir ofan þig.
6Hvað gerirðu honum með því að syndga?
Hvað gerirðu honum ef brot þín eru mörg?
7Hvað gefurðu honum með því að vera réttlátur
eða hvað þiggur hann úr hendi þinni?
8Ranglæti þitt kemur niður á fólki eins og þér,
réttlæti þitt snertir aðeins menn.
9Menn kveina undan fjölmörgum kúgurum,
hrópa á hjálp undan oki voldugra
10en enginn spyr: „Hvar er Guð, skapari minn,
sem lætur lofsöng hljóma um nótt,
11hefur veitt okkur meiri þekkingu en dýrum merkurinnar
og meiri skynsemi en fuglum himinsins?“
12Hann svarar ekki þegar þeir hrópa
vegna hroka illmenna.
13Það er til einskis, Guð heyrir ekki,
Hinn almáttki gefur því engan gaum.
14Þótt þú segir að þú verðir hans ekki var
þá hefur mál þitt verið lagt fyrir hann
og þú verður að bíða hans.
15En nú, þegar hann hefur ekki refsað í reiði sinni
og lætur sér fátt um afbrot finnast,
16galopnar Job munninn, fleiprar
og veður elginn í skilningsleysi sínu.