Síðari kroníkubók 25. kafli2018-01-19T22:16:23+00:00
Síðari kroníkubók 25. kafli

Amasía konungur Júda

1 Amasía var tuttugu og fimm ára þegar hann varð konungur og ríkti tuttugu og níu ár í Jerúsalem. Móðir hans hét Jóaddín og var frá Jerúsalem.
2 Hann gerði það sem rétt var í augum Drottins, þó ekki af heilum hug.
3 Þegar Amasía var orðinn fastur í sessi sem konungur lét hann taka þá embættismenn sína af lífi sem drepið höfðu föður hans, konunginn. 4 Þó lét hann ekki lífláta syni þeirra vegna þess sem skrifað stendur í lögmálsbók Móse þar sem Drottinn mælir svo fyrir „Feður skulu ekki líflátnir fyrir afbrot sona sinna né synir fyrir afbrot feðra sinna. Aðeins má taka mann af lífi fyrir eigin afbrot.“

Stríð gegn Edóm

5 Amasía stefndi nú Júdamönnum saman. Hann fylkti öllum Júdamönnum og Benjamínítum eftir ættkvíslum undir stjórn foringja þúsund manna liða og hundrað manna liða. Því næst kannaði hann liðið, alla sem voru tuttugu ára og eldri, og reyndust þeir vera þrjú hundruð þúsund talsins, einvalalið, búið til herþjónustu, vopnað spjótum og skjöldum. 6 Auk þess réð hann hundrað þúsund hrausta hermenn frá Ísrael fyrir hundrað talentur silfurs.
7 Þá kom guðsmaður nokkur til hans og sagði: „Konungur, her Ísraels ætti ekki að fara með þér af því að Drottinn er ekki með Ísrael né neinum manni frá Efraím. 8 Þótt þú farir og berjist hreystilega mun Guð fella þig frammi fyrir fjandmönnum þínum því að það er á Guðs valdi að hjálpa og að fella.“
9 Amasía spurði þá guðsmanninn: „Hvað á ég þá að gera við þessa hundrað sikla sem ég hef greitt fyrir málaliðið frá Ísrael?“ Guðsmaðurinn svaraði: „Drottinn getur gefið þér meira en það.“
10 Þá greindi Amasía málaliðana, sem höfðu komið til hans frá Efraím, frá hinum hernum og sendi þá aftur heim. Þeir urðu mjög reiðir Júdamönnum og sneru gramir aftur. 11 Því næst herti Amasía upp hugann og lagði upp með her sinn. Hann fór eftir Saltdalnum og vann sigur á tíu þúsund manna herliði frá Seír. 12 Júdamenn tóku einnig tíu þúsund menn lifandi til fanga, fóru með þá efst upp á klett nokkurn, hrintu þeim fram af klettasnösinni svo að þeir limlestust allir. 13 En málaliðarnir, sem Amasía hafði snúið aftur heim og ekki leyft að fara með sér í bardagann, réðust á borgirnar í Júda, allt frá Samaríu til Bet-Hóron. Þeir drápu þrjú þúsund íbúanna og tóku mikið herfang.

Stríð gegn Ísrael

14 Þegar Amasía kom heim eftir sigurinn á Edómítum flutti hann með sér guði Seírmanna. Hann kom þeim fyrir sem guðum sínum, tilbað þá og færði þeim fórnir. 15 Þá reiddist Drottinn Amasía og sendi spámann til hans sem sagði: „Hvers vegna leitar þú til guða framandi þjóðar? Þeir gátu ekki einu sinni bjargað sinni eigin þjóð úr greipum þér?“ 16 Á meðan hann var að tala greip Amasía fram í fyrir honum og sagði: „Hefur þú verið gerður að ráðgjafa konungs? Hættu, annars verðurðu barinn.“ Spámaðurinn þagnaði en sagði fyrst: „Ég veit að Guð hefur ákveðið að leiða yfir þig ógæfu vegna þess að þú gerðir þetta og fórst ekki að ráðum mínum.“
17 Eftir að hafa leitað ráða sendi Amasía til Jóasar Jóahassonar, Jehúsonar, Ísraelskonungs, með þessi boð: „Nú skulum við mætast í orrustu.“ 18 Þá sendi Jóas Ísraelskonungur boð til Amasía, konungs Júda: „Þistillinn í Líbanon sendi sedrustrénu í Líbanon þessi boð: Gefðu syni mínum dóttur þína að konu. En villidýrin í Líbanon hlupu þar hjá og tróðu þistilinn niður. 19 Nú hugsar þú með þér: Ég hef sigrað Edóm. En hjarta þitt hefur ofmetnast. Haltu kyrru fyrir. Hvers vegna æsirðu þig upp og býður ógæfunni heim þar sem þú munt falla og Júda með þér?“
20 En Amasía hafði þetta ráð að engu. Það var vilji Guðs að selja þá í hendur Jóasi þar sem þeir höfðu leitað til guða Edóms. 21 Jóas, konungur Ísraels, hélt þá af stað. Þeim Amasía Júdakonungi laust saman við Bet Semes sem heyrir undir Júda. 22 Júdamenn biðu lægri hlut fyrir Ísraelsmönnum og flýðu til tjalda sinna.
23 Jóas, konungur Ísraels, tók Amasía, konung Júda, son Jóasar Jóahassonar, til fanga við Bet Semes og flutti hann til Jerúsalem. Síðan reif hann niður múra Jerúsalem frá Efraímshliði að hornhliðinu, fjögur hundruð álnir. 24 Hann tók með sér allt gull og silfur og öll áhöld sem fundust í húsi Drottins hjá Óbeð Edóm og í fjárhirslum konungshallarinnar. Hann tók einnig gísla og sneri aftur til Samaríu.

Amasía deyr

25 Amasía Jóasson, konungur í Júda, lifði fimmtán ár eftir dauða Jóasar Jóahassonar Ísraelskonungs. 26 Það sem ósagt er af sögu Amasía, frá upphafi til enda, er skráð í konungabók Júda og Ísraels.
27 Um þær mundir, sem Amasía hætti að fylgja Drottni, var gert samsæri gegn honum í Jerúsalem svo að hann flýði til Lakís. En menn voru sendir á eftir honum til Lakís og þar drápu þeir hann. 28 Hann var fluttur á hestum til Jerúsalem og grafinn þar hjá feðrum sínum í borg Davíðs.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.