Gegn faraó

1 Á tólfta degi tíunda mánaðar á tíunda árinu kom orð Drottins til mín: 2 Mannssonur, snúðu þér að faraó, konungi Egyptalands, og spáðu gegn honum og öllu Egyptalandi. 3 Segðu: Svo segir Drottinn Guð:
Nú held ég gegn þér, faraó,
konungur Egyptalands,
þú mikli krókódíll
sem liggur milli kvísla Nílar
og segir: „Ég á kvíslar Nílar
og bjó þær til.“
4Ég set króka í kjálka þína,
læt fiskana í fljótinu loða við hreistrið á þér,
dreg þig upp úr fljótskvíslum þínum
ásamt öllum fiskunum í Níl
sem loða við hreistur þitt.
5Síðan varpa ég þér út í eyðimörkina
ásamt öllum fiskunum úr kvíslum þínum.
Þú munt liggja úti á víðavangi
og verður hvorki tekinn upp né grafinn.
Ég mun gefa þig dýrum merkurinnar og fuglum himinsins að æti
6og allir íbúar Egyptalands
munu skilja að ég er Drottinn.
Þú reyndist Ísraelsmönnum reyrstafur.
7Þegar þeir gripu um þig hrökkst þú í sundur
og fleiðraðir alla hönd þeirra
og þegar þeir studdust við þig brotnaðir þú
og þeir kiknuðu allir í mjöðmum.
8Þess vegna segir Drottinn Guð:
Ég sendi sverð gegn þér
og tortími mönnum og skepnum.
9Egyptaland skal verða eyðimörk og rústahaugur.
Þá munu þeir skilja að ég er Drottinn.
Þú hefur sagt: „Ég á Níl,
ég bjó fljótið til.“

10 Þess vegna held ég nú gegn þér og kvíslum þínum og geri Egyptaland að rústum og eyðimörk frá Migdól til Sýene og að landamærum Kúss. 11 Hvorki maður né dýr munu stíga þar fæti né fara þar um og það verður óbyggt í fjörutíu ár. 12 Ég geri Egyptaland að eyðimörk innan um önnur eydd lönd og borgir landsins skulu liggja í eyði í fjörutíu ár eins og aðrar borgir í rústum. Ég mun tvístra Egyptum á meðal framandi þjóða og dreifa þeim um löndin.
13 Enn fremur segir Drottinn Guð svo: Þegar fjörutíu ár eru liðin mun ég safna Egyptum saman frá þjóðunum sem þeim var dreift á meðal. 14 Þá mun ég gerbreyta högum Egypta og flytja þá aftur til Patróshéraðs, en þaðan eru þeir. Þar munu þeir mynda lítilfjörlegt ríki, 15 lítilfjörlegra en önnur konungsríki. Það mun ekki framar hefja sig yfir aðrar þjóðir. Ég mun gera þá of fáa til að drottna yfir öðrum þjóðum. 16 Ísraelsmenn munu ekki treysta Egyptum framar og ekki minna mig oftar á sekt sína með því að fylgja þeim. Þá skulu þeir skilja að ég er Drottinn Guð.

Sigur Nebúkadresars á Egyptum

17 Á fyrsta degi fyrsta mánaðarins á tuttugasta og sjöunda árinu kom orð Drottins til mín: 18 Mannssonur, Nebúkadresar, konungur í Babýlon, hefur látið her sinn vinna stórvirki á Týrus. Hvert höfuð varð sköllótt og hver öxl varð slitin. En hvorki hann né her hans hlutu nein laun frá Týrus fyrir verkið sem þeir unnu gegn henni.
19 Þess vegna segir Drottinn Guð svo: Hér með gef ég Nebúkadresari, konungi í Babýlon, Egyptaland. Hann mun taka með sér fjársjóði Egypta, ræna því sem þeir hafa rænt og taka herfang þeirra herfangi og það verða laun hers hans. 20 Ég hef fengið honum Egyptaland að launum fyrir erfiðið sem hann lagði á sig fyrir mig, segir Drottinn Guð. 21 Á þeim degi læt ég Ísraelsmönnum vaxa horn[ og ég mun ljúka upp munni þínum meðal þeirra. Þá munu þeir skilja að ég er Drottinn.