Jesú freistað

1 Þá leiddi andinn Jesú út í óbyggðina til þess að djöfullinn gæti freistað hans. 2 Þar fastaði Jesús fjörutíu daga og fjörutíu nætur og var þá orðinn hungraður. 3 Þá kom djöfullinn og sagði við hann: „Ef þú ert sonur Guðs þá bjóð þú að steinar þessir verði að brauðum.“
4 Jesús svaraði: „Ritað er: Eigi lifir maðurinn á einu saman brauði heldur á hverju því orði sem fram gengur af Guðs munni.“
5 Þá tekur djöfullinn Jesú með sér í borgina helgu, setur hann á brún musterisins 6 og segir við hann: „Ef þú ert sonur Guðs þá kasta þér ofan því að ritað er:
Hann mun fela þig englum sínum
og þeir munu bera þig á höndum sér
að þú steytir ekki fót þinn við steini.“

7 Jesús svaraði honum: „Aftur er ritað: Þú skalt ekki freista Drottins, Guðs þíns.“
8 Enn tekur djöfullinn hann með sér upp á ofurhátt fjall, sýnir honum öll ríki heims og dýrð þeirra 9 og segir: „Allt þetta mun ég gefa þér ef þú fellur fram og tilbiður mig.“
10 En Jesús sagði við hann: „Vík brott, Satan! Ritað er: Drottin, Guð þinn, skalt þú tilbiðja og þjóna honum einum.“
11 Þá fór djöfullinn frá Jesú. Og englar komu og þjónuðu honum.

Ljós upp runnið

12 Þegar Jesús heyrði að Jóhannes hefði verið tekinn höndum hélt hann til Galíleu. 13 Hann fór frá Nasaret og settist að í Kapernaúm við vatnið í byggðum Sebúlons og Naftalí. 14 Þannig rættist það sem Jesaja spámaður mælti:
15Sebúlonsland og Naftalíland við vatnið,
landið handan Jórdanar, Galílea heiðingjanna. [
16Sú þjóð sem í myrkri gengur sér mikið ljós.
Yfir þau sem búa í skuggalandi dauðans skín ljós.

17 Upp frá þessu tekur Jesús að prédika og segja: „Takið sinnaskiptum, himnaríki er í nánd.“

Fylgið mér

18 Jesús gekk með fram Galíleuvatni og sá tvo bræður, Símon, sem kallaður var Pétur, og Andrés, bróður hans, vera að kasta neti í vatnið en þeir voru fiskimenn. 19 Hann sagði við þá: „Komið og fylgið mér og mun ég láta ykkur menn veiða.“ 20 Og þegar í stað yfirgáfu þeir netin og fylgdu honum.
21 Hann gekk áfram þaðan og sá tvo aðra bræður, Jakob Sebedeusson og Jóhannes, bróður hans. Þeir voru í bátnum með Sebedeusi, föður sínum, að búa net sín. Jesús kvaddi þá til fylgdar við sig 22 og þeir yfirgáfu jafnskjótt bátinn og föður sinn og fylgdu honum.

Í Galíleu

23 Jesús fór nú um alla Galíleu, kenndi í samkundum þeirra, prédikaði fagnaðarerindið um ríkið og læknaði hvers kyns sjúkdóm og veikindi meðal fólksins. 24 Orðstír hans barst um allt Sýrland og menn færðu til hans alla sem þjáðust af ýmsum sjúkdómum og kvölum, voru haldnir illum öndum, tunglsjúka menn og lama. Og hann læknaði þá.
25 Mikill mannfjöldi fylgdi honum úr Galíleu, Dekapólis, Jerúsalem, Júdeu og landinu handan Jórdanar.