Amos 8. kafli 2018-01-09T03:39:30+00:00
Amos 8. kafli

Fjórða sýn: Ávaxtakarfa

1Drottinn Guð birti mér í sýn:
Sjáðu, þarna er karfa með sumarávöxtum.
2Hann spurði: „Hvað sérðu, Amos?“
Ég svaraði: „Körfu með sumarávöxtum.“
Þá sagði Drottinn við mig:
„Endalokin eru komin yfir lýð minn, Ísrael,
ég mun ekki láta hann afskiptalausan framar.
3Söngkonur hallarinnar munu kveina á þeim degi,“
segir Drottinn, Guð minn:
„Fjöldi líka liggur á víð og dreif. Hafið hljótt.“

Okrurum refsað

4Heyrið þetta, þér sem troðið fátæklingana niður
og gerið út af við þurfamenn í landinu.
5Þér sem spyrjið: „Hvenær tekur tunglkomuhátíðin enda
svo að vér getum haldið áfram að selja korn?
Hvenær líður hvíldardagurinn hjá?
Vér viljum geta opnað kornhlöðurnar.
Vér ætlum að minnka kornmálið, hækka verðið og falsa vogina.
6Þá getum vér keypt hina umkomulausu fyrir silfur
og fátæklinginn fyrir eina ilskó.
Það er úrgangskorn sem vér seljum.“
7Drottinn hefur svarið við stolt Jakobs:
Aldrei nokkru sinni mun ég gleyma verkum þeirra.
8Hlýtur ekki öll jörðin að skjálfa vegna þess
og allir sem á henni búa að syrgja?
Hlýtur hún ekki að vaxa eins og fljót,
bólgna og réna síðan aftur,
eins og fljót Egyptalands?

Dómsdagur

9Á þeim degi, segir Drottinn Guð,
mun ég láta sólina ganga til viðar um hádegi
og myrkva landið um hábjartan dag.
10Ég mun snúa hátíðum yðar í sorgarathafnir,
breyta lofsöngvum yðar í harmljóð.
Ég mun gyrða allar lendar með hærusekk
og krúnuraka hvert höfuð.
Ég mun færa landinu sorg
eins og sorg eftir einbirni,
endalokin verða eins og hinn bitri dagur dauðans.
11Sjá, þeir dagar koma, segir Drottinn Guð,
að ég sendi hungur til landsins,
hvorki hungur eftir brauði né þorsta eftir vatni,
heldur eftir orði Drottins.
12Þá munu menn reika frá einu hafi til annars,
flakka frá norðri til austurs
og leita að orði Drottins
en þeir munu ekki finna það.
13Á þeim degi verða fríðar ungmeyjar
og æskumenn örmagna af þorsta.
14Þeir sem sverja við syndarsekt Samaríu
og segja: „Svo sannarlega sem Guð þinn lifir, Dan,“
og: „Svo sannarlega sem Guð Beerseba lifir.“
Þeir munu falla og aldrei rísa upp aftur.

Hægt er að nálgast texta þessa kafla í öðrum íslenskum þýðingum með því að smella á nafn þýðingarinnar hér fyrir neðan. Þýðingin opnast í nýjum glugga.