Gagnslaus vínviður

1 Orð Drottins kom til mín:
2Mannssonur. Hvað hefur vínviðurinn
fram yfir aðra teinunga sem vaxa innan um skógartrén?
3Er af honum tekinn efniviður til að smíða eitthvað?
Fæst úr honum snagi sem hengja megi amboð á?
4Nei, hann er hafður í eldivið.
Þegar eldurinn hefur brennt báða enda
og miðjan er sviðin
er hann þá til nokkurs nýtur?
5Á meðan hann var heill
mátti ekkert gagn af honum hafa,
enn síður er hann til neins
þegar eldur hefur sviðið hann og brennt.
6Þess vegna segir Drottinn Guð:
Eins og ég hef farið með vínviðinn
sem óx innan um skógartrén
en ég fleygði á eld sem brenni,
þannig fer ég með yður,
Jerúsalembúar.
7Ég mun beina augliti mínu gegn þeim.
Þá verða þeir sem sleppa úr eldinum
gleyptir af eldi.
Þér munuð skilja að ég er Drottinn
þegar ég beini augliti mínu gegn þeim.
8Ég mun gera landið að auðn
af því að þeir hafa brugðist mér með svikum,
segir Drottinn Guð.