Húsaí blekkir Absalon

1 Síðan sagði Akítófel við Absalon: „Leyf mér að velja tólf þúsund menn og veita Davíð eftirför í nótt, 2 ráðast á hann á meðan hann er þreyttur og uppgefinn og skjóta honum skelk í bringu. Þá flýr allur her hans og ég get drepið konunginn einan. 3 Síðan get ég leitt þjóðina til þín eins og brúði sem kemur til manns síns.[ Þannig fellur sá maður sem þú vilt feigan en herinn sleppur án áfalla.“
4 Absalon og öllum öldungum Ísraels leist vel á þessa hugmynd. 5 Samt sagði Absalon: „Kallið Arkítann Húsaí hingað svo að við getum einnig heyrt skoðun hans.“ 6 Þegar Húsaí kom sagði Absalon honum hvað Akítófel hafði lagt til og spurði: „Eigum við að fara að hans ráðum? Ef ekki skaltu segja það?“
7 Húsaí svaraði Absalon: „Í þetta skipti hefur Akítófel ekki gefið gott ráð.“ 8 Og hann bætti við: „Þú þekkir föður þinn og menn hans og veist að þeir eru bardagahetjur og grimmir eins og birna á bersvæði sem rænd hefur verið húnum sínum. Faðir þinn er bardagamaður sem náttar ekki með hermönnum sínum. 9 Nú hefur hann sjálfsagt falið sig í einhverjum helli eða annars staðar. En verði mannfall í liði okkar í upphafi og berist fréttin um það út verður sagt: Herinn, sem fylgir Absalon, hefur beðið ósigur. 10 Þá mun jafnvel ljónhugað hreystimenni missa kjarkinn því að sérhver Ísraelsmaður veit að faðir þinn er hetja og að þeir sem fylgja honum eru hraustmenni. 11 Af þessum sökum legg ég þetta til: Kallaðu saman allan Ísrael frá Dan til Beerseba og fjöldinn verður sem sandkorn á sjávarströnd, og þú skalt sjálfur fara fyrir þeim. 12 Þegar við finnum hann, hvar sem það verður, leggjumst við yfir hann eins og dögg leggst yfir jörðina. Þá mun enginn komast undan, hvorki hann sjálfur né neinn manna hans. 13 Takist honum að hörfa inn í einhverja borg munum við Ísraelsmenn, allir sem einn, binda reipi utan um þá borg og draga hana niður í dalinn uns þar finnst ekki einu sinni steinvala.“
14 Þá sagði Absalon og allir Ísraelsmenn tóku undir: „Ráð Húsaí Arkíta er betra en ráð Akítófels.“ En Drottinn hafði ákveðið að gera hið góða ráð Akítófels að engu því að Drottinn ætlaði að steypa Absalon í glötun.

Davíð kemst undan

15 Húsaí sagði nú við prestana Sadók og Abjatar: „Akítófel lagði eitt til við Absalon en ég annað. 16 Sendið nú þegar í stað mann til Davíðs með þessi skilaboð: Í nótt skaltu ekki láta fyrirberast við vöðin yfir til eyðimerkurinnar, farðu heldur þegar í stað yfir um svo að þú, herra konungur, verðir ekki gersigraður ásamt öllum hernum sem með þér er.“
17 Jónatan og Akímaas biðu við Rógellind. Þjónustustúlka nokkur gekk þá til þeirra og flutti þeim skilaboðin og þeir fóru með þau til Davíðs konungs. Þeir máttu ekki láta sjá sig og gátu því ekki farið inn í borgina. 18 Samt kom unglingur nokkur auga á þá og sagði Absalon frá því. En þeir Jónatan og Akímaas flýttu sér báðir á brott og fóru heim til manns nokkurs í Bahúrím. Í húsagarði hans var brunnur sem þeir fóru ofan í. 19 Húsfreyjan sótti teppi, breiddi það yfir brunnopið og stráði síðan korni yfir svo að ekkert grunsamlegt sást.
20 Þegar þjónar Absalons komu inn í húsið til konunnar spurðu þeir: „Hvar eru Akímaas og Jónatan?“ Hún svaraði: „Þeir fóru í áttina að vatninu.“ Þjónarnir leituðu án þess að finna þá og sneru aftur til Jerúsalem.
21 Þegar þeir voru farnir komu báðir mennirnir upp úr brunninum. Þeir fóru síðan til Davíðs konungs, fluttu honum skilaboðin og sögðu einnig við hann: „Farið og flýtið ykkur yfir ána því að Akítófel hefur lagt á ráðin gegn ykkur.“ 22 Þá hélt Davíð af stað ásamt öllum hernum, sem með honum var, og fór yfir Jórdan. Þegar lýsti af degi voru allir komnir yfir Jórdan og var enginn eftir.
23 Þegar Akítófel komst að raun um að ráði hans hafði ekki verið fylgt lagði hann á asna sinn og hélt til heimaborgar sinnar. Þar ráðstafaði hann eigum sínum. Síðan hengdi hann sig og lét þannig lífið. Hann var grafinn í gröf föður síns.
24 Þegar Davíð kom til Mahanaím var Absalon kominn yfir Jórdan ásamt öllum Ísraelsher. 25 Absalon hafði gert Amasa að yfirhershöfðingja í staðinn fyrir Jóab. Amasa var sonur Ítra frá Ísmael og Abígal. Hún var Nahasdóttir, systir Serúju, móður Jóabs. 26 Ísraelsmenn og Absalon settu upp búðir sínar í Gíleað.
27 Um leið og Davíð kom til Mahanaím komu Sóbí Nahasson frá Rabba í Ammón og Makír Ammíelsson frá Lódebar og Gíleaðítinn Barsillaí frá Rógelím til Davíðs. 28 Þeir færðu Davíð og hernum, sem var með honum, dýnur og ábreiður, skálar og leirker og enn fremur hveiti, bygg, mjöl og ristað korn, ertur og linsubaunir, 29 hunang og súrmjólk, fénað og ost. Þeir hugsuðu með sér: „Hermennirnir eru svangir, þyrstir og uppgefnir eftir dvölina í eyðimörkinni.“