Þið skuluð ekki reyna Drottin eins og þið reynduð hann við Massa.
Þið eigið að halda fyrirmæli Drottins, Guðs ykkar, í einu og öllu, lög þau og ákvæði sem hann hefur sett ykkur. Þú skalt gera það sem rétt er og gott í augum Drottins svo að þér vegni vel og þú komist inn í og fáir til eignar landið góða sem Drottinn hét feðrum þínum. Drottinn mun ryðja öllum fjandmönnum úr vegi þínum eins og hann hefur heitið.
Þegar sonur þinn spyr þig seinna meir: „Hvaða fyrirmæli, lög og ákvæði eru þetta sem Drottinn, Guð okkar, setti ykkur?“ skaltu svara syni þínum: „Við vorum þrælar faraós í Egyptalandi en Drottinn leiddi okkur út úr Egyptalandi með sterkri hendi. Fyrir augum okkar gerði Drottinn mikil tákn og máttarverk sem skæð urðu Egyptalandi, faraó og allri fjölskyldu hans. En okkur leiddi hann þaðan til þess að fara með okkur inn í landið sem hann hafði heitið feðrum okkar að gefa okkur. Drottinn bauð okkur að fara að öllum þessum lögum og óttast Drottin, Guð okkar, svo að okkur vegnaði ætíð vel og hann léti okkur lífi halda eins og allt til þessa. Því aðeins hljótum við réttlæti að við gætum þess að fylgja öllum þessum fyrirmælum frammi fyrir augliti Drottins, Guðs okkar, eins og hann hefur boðið okkur.“
Þegar Drottinn, Guð þinn, hefur leitt þig inn í landið sem þú heldur nú inn í til að taka það til eignar, mun hann ryðja mörgum þjóðum úr vegi fyrir þér, Hetítum, Gírgasítum, Amorítum, Kanverjum, Peresítum, Hevítum og Jebúsítum, þeim sjö þjóðum sem eru fjölmennari og voldugri en þú. Þegar Drottinn, Guð þinn, hefur gefið þér þær á vald og þú hefur sigrað þær skaltu helga þær banni. Þú mátt ekki gera við þær sáttmála, ekki hlífa þeim og ekki mægjast við þær. Þú skalt hvorki gefa dætur þínar sonum þeirra né taka dætur þeirra til handa sonum þínum.
Það mundi snúa sonum þínum frá fylgd við mig svo að þeir færu að þjóna öðrum guðum. Þá mundi reiði Drottins blossa upp gegn ykkur og eyða þér þegar í stað. En þannig skuluð þið fara með þær: Þið skuluð rífa niður ölturu þeirra, brjóta merkisteina þeirra, höggva niður Asérustólpa og brenna skurðgoð þeirra í eldi. Því að þú ert heilög þjóð fyrir Drottni Guði þínum. Drottinn valdi þig til að verða eignarlýður hans meðal allra þjóða sem búa á yfirborði jarðar.