Hið íslenska biblíufélag er nú að hefja mikilvægt og spennandi söfnunarátak undir yfirskriftinni „Bakhjarl Biblíunnar“. Undanfarin misseri hefur Biblíufélagið bent á þær miklu breytingar sem hafa orðið í því hvernig fólk nálgast lesefni og upplýsingar. Í síauknum og vaxandi mæli er fólk að nálgast lesefni í gegnum tölvur og snjalltæki. Fólk er þannig t.d. mikið að lesa og hlusta á efni í gegnum snjallsímann sinn eða önnur raftæki.

Við hjá Biblíufélaginu höfum þess vegna fengið ástríðu fyrir því að sjálf bók bókanna, Biblían, verði ekki skilin eftir í þessari upplýsingabyltingu. Við höfum ákveðið að sækja fram til að hún megi verða gerð aðgengileg á þessum nýju miðlum. Því fólk er ekki alltaf með Biblíuna í vasanum, en það er flest alltaf með símann í vasanum.

Biblíufélagið hefur nú þegar lagt af stað í þennan leiðangur og þess vegna þá er það orðið að veruleika að hægt er að lesa Biblíuna og hlusta á Nýja testamentið í gegnum tölvur og snjallsíma.

En Biblíufélagið vill halda áfram á þessari vegferð og auka aðgengi Biblíunnar á nýjum miðlum enn frekar. Við viljum hljóðrita meira af Biblíunni, útbúa Biblíuefni fyrir börn fyrir snjalltæki og nota allar leiðir færar til að færa Biblíuna þangað sem fólkið er.

Þess vegna erum við að leita til dyggra félagsmanna okkar, með sömu ástríðu og við, að þeir gerist svokallaðir bakhjarlar Biblíunnar á Íslandi og styðji við þess sókn með mánaðarlegu framlagi. Má bjóða þér að hjálpa til og gerast bakhjarl Biblíunnar á Íslandi?

Smelltu hér til að verða mánaðarlegur Bakhjarl Biblíunnar! 

Með því að smella á hlekkinn hér fyrir ofan og fylla út upplýsingar, skráir þú þig fyrir mánaðarlegum raðgreiðslum til stuðnings Biblíufélaginu. Ef þú þarft að breyta eða hætta stuðningi af einhverjum ástæðum, er auðvelt að senda tölvupóst á hib@biblian.is og við munum þá snarlega fella niður mánaðarlegar skuldfærslu. [Nánari skilmálar!]