Í upphafi stjórnar Jójakíms Jósíasonar Júdakonungs kom þetta orð frá Drottni: Svo segir Drottinn: Gakktu inn í forgarð húss Drottins og ávarpaðu alla þá sem koma frá borgunum í Júda til að biðjast fyrir í húsi Drottins. Flyttu þeim allt sem ég býð þér án þess að draga neitt undan. Ef til vill hlusta þeir og snúa hver og einn frá villu síns vegar. Þá mun ég iðrast þeirrar ógæfu sem ég hugðist leiða yfir þá vegna illrar breytni þeirra.
Þú skalt segja við þá: Svo segir Drottinn: Ef þér hlýðið ekki á mig og fylgið ekki lögmáli mínu sem ég hef lagt fyrir yður og hlustið ekki á ræður þjóna minna, spámannanna, sem ég hef hvað eftir annað sent til yðar án þess að þér hlustuðuð á þá, mun ég fara með þetta hús eins og Síló. Þessa borg mun ég gera að bölvun fyrir allar þjóðir jarðar.
Prestarnir, spámennirnir og allt fólkið hlustaði á Jeremía þegar hann flutti þessa ræðu í húsi Drottins. En þegar Jeremía hafði lokið við að segja allt það sem Drottinn hafði falið honum að tala til fólksins gripu prestarnir hann, spámennirnir og allt fólkið og hrópuðu: „Þú skalt svo sannarlega deyja. Hvers vegna boðar þú í nafni Drottins að fyrir þessu húsi fari eins og Síló og þessi borg verði lögð í rúst og yfirgefin?“ Síðan þyrptist allt fólkið að Jeremía í húsi Drottins.
Þegar höfðingjar Júda fréttu þetta gengu þeir frá konungshöllinni til húss Drottins og settust við Nýja hliðið. Því næst ávörpuðu prestarnir og spámennirnir höfðingjana og allt fólkið og sögðu: „Þessi maður er dauðasekur því að hann hefur flutt spádómsorð gegn þessari borg eins og þér hafið heyrt með eigin eyrum.“
Þá ávarpaði Jeremía höfðingjana og allt fólkið og sagði: „Drottinn sendi mig til að tala gegn þessu húsi og þessari borg allt sem þér hafið heyrt. Bætið nú framferði yðar og breytni og hlýðið á boð Drottins, Guðs yðar. Þá mun Drottinn iðrast þeirrar ógæfu sem hann hefur boðað yður. Sjálfur er ég á yðar valdi. Farið með mig eins og yður sýnist best og réttast. En það skuluð þér vita fyrir víst að líflátið þér mig látið þér saklaust blóð koma yfir sjálfa yður, þessa borg og íbúa hennar. Drottinn hefur í sannleika sent mig til yðar til þess að flytja yður þessa ræðu.“
Þá sögðu höfðingjarnir við allt fólkið, prestana og spámennina: „Þessi maður er ekki dauðasekur því að hann hefur talað til vor í nafni Drottins, Guðs vors.“ Ýmsir af öldungum landsins risu þá á fætur, ávörpuðu allt fólkið og sögðu: „Míka frá Móreset var spámaður þegar Hiskía var konungur í Júda. Hann sagði við alla Júdamenn:
Svo segir Drottinn hersveitanna:
Síon verður plægð sem akur,
Jerúsalem verður rúst
og musterisfjallið kjarri vaxnar hæðir.

Létu Hiskía Júdakonungur og allir Júdamenn taka hann af lífi? Óttaðist hann ekki öllu heldur Drottin svo að hann mildaði auglit Drottins sem hætti við að senda þeim þá ógæfu sem hann hafði hótað? En vér erum að því komnir að kalla ógæfu yfir sjálfa oss.“