Um skýrsluna „Stafrænar þjóðir 2025: Hvernig við þurfum að endurhugsa notkun á Biblíunni í stafrænum heimi
Ný skýrsla frá Breska og erlenda biblíufélaginu British and Foreign Bible Society (BFBS) hvetur til þess að við hugsum á nýjan hátt um trúboð á stafrænni öld. Skýrslan, sem ber titilinn Stafrænar þjóðir 2025, lýsir stafrænum vettvangi ekki aðeins sem tækjum eða rásum, heldur sem stafrænum þjóðum með einstaka menningu, tungumál og andlegar þarfir.
Í þessum stafrænu þjóðum — stöðum á borð við YouTube, TikTok, Discord og Twitch —er fólk ekki bara að vafra; það tilheyrir samfélagi. Skýrslan Stafrænar þjóðir 2025 býður biblíufélögunum að glíma við grundvallarspurningu:
Hvað ef við nálgumst stafrænan vettvang af sömu ástríðu og við höfum fyrir öðrum þvermenningarlegum verkefnum?
Skýrslan byggir á ítarlegum rannsóknum, þar á meðal viðtölum við 1.700 áhrifavalda sem vinna með biblÍutengt efni og könnun á vinsælustu vefsvæðunum.
Á meðan milljarðar manna eyða rúmlega sex klukkustundum daglega á netinu er hlutfall þeirra sem hlusta á eða nota biblíutengt efni á netinu ískyggilega lágt. Hér má vísa í Matt 9:37, „…uppskeran er mikil en verkamennirnir fáir.“
Þarna gefst Sameinuðu biblíufélögunum gullið tækifæri.
Styðjum frumkvöðlana
Ein mest sláandi niðurstaðan er sú einangrun sem margir kristnir áhrifavaldar á vefnum upplifa. Þrátt fyrir að þjóna í fremstu víglínu stafræns trúboðs skortir áhrifavaldana oft andlegan, fjárhagslegan og stefnumótandi stuðning. Flestir eru þeir undirfjármagnaðir, vanmetnir og ótengdir kirkjulegu starfi í víðara samhengi.
Margir stafrænir biblíuáhrifavaldar vinna einir, berjast við að ná endum saman og bera hitann og þungann af mótun, tileinkun og þjálfun, án þess stuðnings sem við bjóðum hefðbundnum trúboðum reglulega.
Þetta felur í sér umtalsverða áskorun en einnig gríðarlegt tækifæri fyrir biblíufélögin. Með því að finna áhrifavalda, þjálfa þá og fjármagna og vinna náið með þeim, geta biblíufélögin hjálpað til við að koma Biblíunni á framfæri til milljarða manna.
Þrjár aðferðir
Skýrslan kynnir þrjár aðferðir fyrir samtök sem leita tækifæra á stafrænum vettvangi:
- Að finna og styðja við þá áhrifavalda er starfa sem trúboðar á stafrænum vettvangi og kynna Biblíuna þar
Rétt eins og biblíufélög hafa stutt þýðendur og trúarleiðtoga í nærsamfélögum sínum, þar sem áherslan hefur verið á prentmiðla, gefst okkur kostur á að líta á áhrifavalda á netinu sem stafræna fagnaðarboða nútímans — trúboða á vettvangi sem móta heimssýn næstu kynslóðar. - Fjármagna og vinna saman að því að gera Biblíuna stafræna
Það þarf að útbúa efni sem hentar stafrænni menningu, skilar sér til notenda, er hnitmiðað og sjónrænt, í samstarfi við þau sem nú þegar hafa náð árangri á þessu sviði. - Að endurmóta stafræna vettvanginn sem andlegt rými
Rétt eins og borgir, bæir og þorp hafa sína eigin menningu og viðhorf hafa netsamfélög einnig sína eigin menningu og viðhorf. Að nota stafræna vettvanginn sem andlegt rými merkir að við þurfum að vera reiðubúin að læra og virða þá menningu sem þar er fyrir, en ekki aðeins mæta með okkar eigið efni, á okkar eigin forsendum.
Hvernig geta biblíufélög brugðist við?
Biblíufélögin eru í einstakri stöðu til þess að styrkja stafrænt trúboð af krafti með því að:
- Þýða Biblíuna yfir á sjónmiðla og á hljóðrænu formi sem eru sniðin að þeim vettvangi sem efnið birtist á.
- Þjálfa áhrifavalda í nærsamfélaginu til að deila Ritningunni í stafrænum samfélögum sínum á trúverðugan hátt.
- Vinna með áhrifavöldum og trúarleiðtogum sem þegar eru virkir á þessu sviði.
- Mæla árangur einstakra verkefna.
- Fjárfesta í nýjustu tækni á borð við gervigreind, stuttum myndböndum og leikvæðingu (e. Gamification).
Stafræn tækni þarf að vera hluti af umræðu biblíufélaga, þegar sýnin „Biblían ætluð öllum,“ er þróuð áfram. Það er ekki nóg að hugsa aðeins um stafræna dreifingu, heldur þarf að ræða um stafrænt trúboð — að fá til liðs við sig nýja kynslóð trúaðs fólks sem lifir og leiðir í netheimum þar sem fólk kemur saman, myndar tengsl og leitar tilgangs.