Ítarlegar upplýsingar um söfnun

Á síðustu árum hefur verið rætt innan Biblíufélagsins um hvort þörf sé á nýrri Biblíuþýðingu. Umræðan hefur tengst almennri þjóðfélagsumræðu um breytingar á íslensku máli og rannsóknum á lesfærni og lesskilningi Íslendinga. Svipuð umræða hefur verið í gangi hjá systurfélögum okkar á Norðurlöndunum. Þannig gaf Danska Biblíufélagið út Bibelen 2020 fyrir nokkrum árum, og finnska Biblíufélagið gaf út UT2020, nýþýðingu á Nýja testamentinu út á svipuðum tíma. Í báðum tilfellum var um að ræða þýðingu þar sem megináhersla var lögð skiljanleika textans, en minni áhersla lögð á hefðbundið kirkjulegt orðfæri. Þannig eru eldri þýðingar á finnsku og dönsku ennþá notaðar í helgihaldi kirkjunnar, þrátt fyrir að nýju þýðingarnar njóti sífellt meiri vinsælda, sér í lagi í Finnlandi.

Hið íslenska biblíufélag hefur ákveðið að feta í fótspor félaga okkar á Norðurlöndunum og hefjast handa við nýþýðingu á Biblíunni. Í upphafi verður horft til Nýja testamentisins og nú í vor byrjum við á þýðingu Markúsarguðspjalls. Verkefnið verður unnið af sérfræðingum á sviði fornmála, í náinni samvinnu við rithöfund, sem vinnur að endanlegri gerð textans. Þá mun Biblíufélagið leita til valins hóps fólks á öllum aldri um að veita umsagnir um þýðinguna á öllum stigum hennar.

Þýðing Biblíunnar er kostnaðarsöm og mun Hið íslenska biblíufélag sinna verkefninu eftir því sem fjárhagur leyfir hverju sinni. Því leitum við til almennings, trúfélaga og kirkjusafnaða um að styðja verkefnið nú í tengslum við Biblíudaginn 2026.