Sálmur 120
Ég ákalla Drottin í nauðum mínum
og hann bænheyrir mig.
Drottinn, bjarga mér frá ljúgandi vörum
og tælandi tungum.
Hvernig mun hann hegna þér,
hvað láta koma yfir þig,
svikula tunga?
Hvesstar örvar hermanns
ásamt glóandi kolum.
Vei mér því að ég dvelst í Mesek,
verð að búa hjá tjaldbúðum Kedars.
Of lengi hef ég búið
hjá þeim er friðinn hata.
Þegar ég tala um frið
vilja þeir ófrið.
Sálmur 121
Ég hef augu mín til fjallanna,
hvaðan kemur mér hjálp?
Hjálp mín kemur frá Drottni,
skapara himins og jarðar.
Hann mun ekki láta fót þinn skriðna,
vörður þinn blundar ekki.
Nei, hann blundar ekki og sefur ekki,
hann, vörður Ísraels.
Drottinn er vörður þinn,
Drottinn skýlir þér,
hann er þér til hægri handar.
Um daga mun sólarhitinn ekki vinna þér mein
né heldur tunglið um nætur.
Drottinn mun vernda þig fyrir öllu illu,
hann mun vernda sál þína.
Drottinn mun varðveita útgöngu þína og inngöngu
héðan í frá og að eilífu.