1 Davíðssálmur.
Ég vil syngja um náð og rétt,
lofsyngja þér, Drottinn.
2Ég vil gefa gætur að vegi hins ráðvanda,
hvenær kemur þú til mín?
Í grandvarleik hjartans
vil ég ganga um í húsi mínu.
3Ég vil ekki hafa illvirki fyrir augum,
ég hata þá sem aðhafast illt
og samneyti þeim ekki.
4Svikult hjarta skal frá mér víkja,
illmenni vil ég eigi þekkja.
5Rægi einhver vin sinn á laun
þagga ég niður í honum.
Þann sem hefur þótta í augum og hroka í hjarta
fæ ég ekki þolað.
6Augu mín hvíla á hinum trúföstu í landinu,
þeir fá að búa hjá mér;
sá sem gengur veg hins ráðvanda
mun fá að þjóna mér.
7Enginn má hafast við í húsi mínu
er svik fremur.
Sá sem fer með lygar
stenst ekki fyrir augum mínum.
8Hvern morgun þagga ég niður
í öllum óguðlegum í landinu
og útrými úr borg Drottins
öllum illgjörðamönnum.
