Sr. Sigurður Rúnar Ragnarsson er sóknarprestur í Norðfjarðarprestakalli. Á afmælisári Biblíufélagsins, í fyrra, flutti sr. Sigurður frumorta bæn við upphaf prédikunar á Biblíudaginn. Hann gaf Biblíufélaginu þessa fallegu bæn að gjöf. Félagið þakkar sr. Sigurði innilega fyrir.
Í Biblíunni boðskap Guðs má finna.
Boðun hans og heilagt orð er þar.
Allt sem hann vill manninn hér á minna,
hún mótar trúna, leiðir, veitir svar.
Boðskap þeim sem blessun orðsins veitir,
beinir hann til þess er kom á jörð.
Son oss gaf sem Jesús Kristur heitir,
sá er leiðir oss í einni hjörð.
Enn í dag er Biblían oss brunnur.
Boðskap hennar meðtökum við enn.
Hann er okkur öllum heyrinkunnur.
Hann opinberar kærleik Guðs við menn.
Sigurður Rúnar Ragnarsson