Jóel starfaði sem spámaður í Jerúsalem eða nágrenni hennar og hefur verið tengdur musterinu og helgihaldi þar með einhverjum hætti en fátt er annars vitað um hann.
Ritið hefst á lýsingu á engisprettuplágu, meiri og ógurlegri en menn höfðu áður kynnst. Í þessum hörmungum sér spámaðurinn tákn um komandi dag Drottins þar sem Drottinn mun refsa þeim sem standa gegn réttlátum vilja hans. Spámaðurinn boðar hvatningu Drottins til þjóðarinnar um að gera iðrun og heitir henni þá endurreisn og blessun. Eftirtektarvert er fyrirheitið um að Guð muni senda anda sinn yfir alla, jafnt karla sem konur, unga og gamla.

Skipting ritsins

1.1–2.18 Engisprettuplága
2.19–2.27 Endurreisn heitið
3.1–4.21 Dagur Drottins