„Ég krýp á jólum, Jesúbarn, við jötustokkinn þinn“

2018-01-05T06:58:22+00:00 Miðvikudagur 24. desember 2014|

Eysteinn G. Gíslason (Eysteinn í Skáleyjum) orti jólasálm sem hann kallar Maríusonur við eitt vinsælasta jólalag allra tíma  Mary’s Boy Child sem er líklega þekktast í flutningi Boney M. árið 1978. Lagið samdi Jester Hairston árið 1956 og síðan þá hafa margir listamenn flutt það eins og t.d. Nat King Cole, Roger Whittaker, Tom Jones, John Denver og fleiri. 

 

Maríusonur

Það hugljúfa orð og ævintýr

skal ennþá mönnum sagt:

Á fyrstu jólum jötu í

var Jesúbarnið lagt.

En stjarnan björt af himni hátt

á helgri nóttu skein,

hún lýsti yfir lágan stall

og lítinn mömmusvein.

Fjármönnum englar fluttu boð

um fæðing lausnarans,

og hirðar bljúgir beygðu kné

í bæn við jötu hans.

Þeir heyrðu óma englasöng

í ást og þakkargjörð,

um dýrð Guðs föður, frelsun heims

og frið um alla jörð.

Maríubarn, við biðjum þess,

þú birtist enn á ný.

Það skortir víða frelsi, frið

og fögnuð veröld í.

Um stillta nótt er stjarna skín

á stofugluggann minn,

ég krýp á jólum, Jesúbarn,

við jötustokkinn þinn.

Hið íslenska biblíufélag óskar félagsfólki og velunnurum félagsins gleðilegra jóla. Megi gleði og fögnuður jólanna fylgja ykkur á nýju ári.

Skrifstofa Híb verður lokuð til mánudagsins 29. desember og opnar eftir áramót mánudaginn 5.janúar.

Gleðileg jól!